MALAYBALAY CITY, Bukidnon, Agosto 8 (PIA)-- Temporaryong gi-suspende ni governor Jose Maria R. Zubiri ang trabaho sa tanang mga empleyado nga nag opisina sulod sa kapitolyo sugod, Agosto 6 sa hapon. Ang pag-suspende molungtad hangtud kanus-a mohatag ug abeso ang Gobernador.
Kini human nga dunay nadawat nga taho gikan sa Provincial Health Office kon (PHO) nga naay nag-positibo sa RT-PCR o swab test nga isa sa mga empleyado sa kapitolyo.
Matud pa ni Atty. Jay Albarece, provincial administrator, nga dose (12) ka mga empleyado ang unang gi-swab test niadtong Lunes Agosto 3, gamit ang kaugalingong RT-PCR test kits sa probinsya.
Gipatawag dayon ni Gov. Zubiri ang tanang mga provincial heads niadtong Martes Agosto 4, nga karong semanaha mag pahigayon ug swab test aron mahibal-an ang estado sa matag usa ug mahimong andam kun ugaling adunay mataptan sa maong sakit nga COVID-19.
Base sa report, ang nag positibo usa ka babaye, 42 anyos, minyo ug lumolupyo sa Barangay Casisang, syudad sa Malaybalay.
Ang maong babaye gidala dayon sa Northern Mindanao Wellness and Reintegration Center o NMWRC sa Barangay Casisang, Malaybalay City ug gipahigayon ang dugang eksaminasyon lakip na niini ang subling pag-swab test.
Kasamtangang nagpabilin ang nasangpit nga babaye nga asymptomatic o walay nakitang mga simtomas hangtud niining panahona.
Gisugdan na usab ang ‘contact-tracing’ ug gi-abesohan na ang iyang pamilya alang sa pagpailawom sa home quarantine lakip na ang mga kauban sa opisina.
Gawas niana, gipahigayon na usab ang ‘decontamination’ sa tanang opisina sulod sa kapitolyo aron maseguro nga dili mokuyanap ang maong sakit. (BGEpan/PIA-Bukidnon)
Source: Philippines Information Agency (pia.gov.ph)
0 Comments