Cebuano News: BBA: Bayanihan 2 loan moratorium gipatuman dinhi

TAGBILARAN CITY, Bohol, Sept. 25 (PIA) -- Gipatuman na karon dinhi sa Bohol ang gimandu sa probisyones sa Bayanihan To Recover as One Law kabahin sa bugtong nga tanyag sa 60 ka adlaw nga mahimong dili una mabayaran ang mga kasamtangan nga buhi ug aktibo nga huwam, o bisag talitapos na, basta aktibo pa hangtud Disyembre 2020. 

WALAY MAKAPUGONG SA BANGKO UG NANGHUWAM KON MAGSABUT LANG. Alang sa mga nanghuwam nga apike gyud ang ibayad, pakigsabut sa bangko kay segun pa sa Bayanihan Law 2, mahimo kini nga buhaton. (PIA Bohol)

Hinuon, gipasabut ni William Ramirez, Vice President sa Bohol Bankers Association (BBA) nga sa gipagawas nga guidelines sa Bangko Sentral ng Pilipinas kabahin sa bugtong nga tanyag sa duha  ka buwan nga moratorium, alang lamang kini niadtong walay nalat-angan nga binuwan nga hatagon, o kadtong may maayong credit standing.  

Bisan pa hinuon niini, una na nga gipadayag sa BBA nga bisan sa duha  ka buwan nga dili una pabayran ang huwam, angay magbantay ang nanghuwam kay dili automatic nga mouswag ang katas-on sa nakasabutan na nga huwam o no extended term.

Kini nagpasabut nga kon ang gihuwaman nga salapi may termino nga 3 ka tuig, kini nagpasabut nga bisan pa sa duha  ka buwan nga moratorium sa bayranan, may buwan gihapon sulod sa tulo ka tuig nga mobayad og doble aron masapal ang duha ka buwan nga nalat-angan, segun sa BBA sa ilang hubad sa guidelines.

Apan hinuon, segun sa balaod nga kini mag-anak ang tubo, silot  ug uban pang mga balayranan kon kabayaran na sa dili pa ang Disyembre 31, ug nga kini magpa-inat sa pagkahuman sa termino sa loans. 

Gani, segun pa sa BBA sa ilang paghubad sa Bangko Sentral Guidelines, aduna pay accrued interests nga bayaran samtang ang binuwan nga huwam nagtangag niini.

Segun sa Section 4 uu sa Bayanihan Law 2, gimandu sa balaod ngadto sa tanang bangko, quasi-banks, financiang companies, lending institutions, real estate developers, insurance companies nga nagtanyag og polisiya sa life insurance, pre-need companies, mga establisemento nga nagatanyag og in-house financing alang  sa  mga butang, mga kompanya nga nagdumala sa assets  ug liabilities, pribado ug publiko nga financial institutions lakip na ang Government Service Insurance System (GSIS) Social Security System (SSS), Home Development Mutual Fund (PAG-IBIG) ang pagpatuman sa 60 ka adlaw nga moratorium.

Nalakip sa mga mahimong maka-gamit sa 2 ka buwan nga grace period ang mga utang sama sa salary, personal, housing, commercial, motor vehicle loans, amortizations, abangan, premium payments, bayranan sa credit cards.

Dugang pa, bisan sa duha  ka buwan nga moratorium sa bayranan, matud pa sa balaod nga walay makapugong sa bangko o mga nagpahuwam ug sa nanghuwam sa pagsabutsabot kon ipakatay pa ang bayranan ug termino sa loan sobra sa 60 ka adlaw.

Ngadto sa mga bangko ug nagpahuwam nga makigsabut ug motanyag pa sa sobra sa 60 ka kadlaw nga mandatory grace period, makadawat sila sa regulatory relief gikan  sa BSP sama sa staggered booking allowances alang sa credit losses, excemption sa bank-loss provisioning, real estate loans cap ug mahimong dili na kini maapil  sa lista sa taho sa BSP kabahin sa non-bank financial institutions non-performing loans. (rahc/PIA-7/Bohol)   

Source: Philippines Information Agency (pia.gov.ph)