Cebuano News: Tubigon na-sentro sa kahingawa dala sa COVID-19

NAGMASK NA, MAGSHIELD PA. Human gipatuman ang pugos nga pagsul-ob sa face mask sa Bohol, pugos na usab ang pagsul-ob sa face shield sa mga tindero ug tindera sa kamerkadohan sa Bohol. Apan bisan pa, kon unsa nga hitabo-a nga ang mga mamaligyaay og karne sa Tubigon, maoy naka-angin sa sakit, kini angayan nga mahibalo-an sa mga tinugyanan. (rahc/PIA-7/Bohol)   

TAGBILARAN CITY, Bohol, Sept. 25 (PIA) -- Minglabyog na usab ang sentro sa kahingawa sa mga Bol-anon ngadto sa lungsod sa Tubigon, dala sa kalit nga pagdaghan sa mga tawo nga apektado sa Coronavirus disease (COVID-19) didto.

Gani, niining pagsuwat, gipasirado na ang wet-market sa Tubigon Public Market aron kahimo-an sa pagpamatay kagaw tungo sa gikataho nga mga mamaligyaay og karne nga nagpositibo sa COVID-19. 

May mga ginagmay na usab nga mga lockdowsn ang gihimo sa pipila ka nga residensya dala gihapon sa gikahingawaan nga sakit, segun sa taho.  

Sa labing uwahi nga taho sa Bohol Inter Agency task Force on the Management of Emerging Infectious Diseases (BIATF MEID), mataho ang ika 22 nga kaso sa COVID sa lungsod nga mitampo sa kinatibuk-ang 60 ka aktibong kaso sa COVID sa Bohol, Septembre 24.  

Sa 22 ka kaso sa Tubigon, duha niini ang mga health care workers nga naglihok sa pag-atiman sa mga masakiton didto samtang and 20, mga residente nga wala makabyahe gawas sa Bohol, segun sa taho sa Medical Cluster sa BIATF.

Dala na usab niini, naneguro ang Munisipyo sa Inabanga sa pagpasira usab sa ilang Buhatan sa Municipal Social Welfare and Development sanglit nakasulod dito ang usa ka empleyado sa nasudnong kagamhanan nga nag positibo sa sakit ug may tuyo sa buhatan.  

Sunod sa Tubigon ang San Miguel nga may kinatibuk-an nga 9 ka kaso diin unom niini ang walay travel history samtang ang tulo, mga locally stranded individuals (LSI) nga nanguli sa ilang lungsod, segun pa ni mayor Virgilio Mendez sa San Miguel.

Ikatulo sa kadaghanon ang Candijay, kinsa mitala og 7 ka kaso sa COVID, ang pito niini pulos mga LSI ug karon kasamtangan nga gipailawom pa sa kwarantina.

Lima ang kaso sa COVID-19 sa Carmen, ang upat niini, mga LSI samtang ang usa, residente nga walay gilakwan nga lugar nga gawas sa Bohol.

Ikalima ang Talibon, nga may natala nga 3 ka kaso sa COVID, pulos kini walay laing lugar nga gibisitahan.

Ang Tagbilaran City, Duero, Trinidad, Calape milatal sa tag duha ka kaso, sa Tagbilaran City, ang duha pulos mga Authorized Persons Outside Residence (APOR), samtang pulos mga LSI ang mga kaso sa Duero, Trinindad ug Calape.

May tags aka kaso usab sa COVID ang nataho sa Dimiao, Anda, Danao, Lobo ug Jagna, ang mga kaso nga natala, pulos mga LSI nga namauli na sa ilang mga kalungsuran.

Kini usab samtang ang Talibon, Tagbilaran, Bien Unido ug Trinidad ang mga dapit nga nag-una sa mga may kanhi nga kaso sa COVID-19 apan  nauli-an na ang mga pasyente.

Mikabat na sa 67 ka Talibongnon ang nauli-an sa sakit, 43 sa Tagbilaran, 24 sa Bien Unido ug 19 sa Trinidad ang karon luwas na sa sakit nga makamatay. (rahc/PIA-7/Bohol)

Source: Philippines Information Agency (pia.gov.ph)