Cebuano News: Conplas batok COVID-19 wala pa gamita dinhi- GCGMH

TAGBILARAN CITY, Bohol, Sept. 30 (PIA) -- Wala pay bansay alang sa convalescent plasma nga gamiton aron pagpakati sa natural nga antibodies sa pasyente nga nagsakit sa coronavirus (COVID) dinhi.

Kini maoy gipadayag sa Gov. Celestino Gallares Memorial Hospital (GCGMH) bisan pa nga ania na sa Bohol ang apheresis machine nga makakuha sa dugo ug magpalain sa plasma niini, aron magamit sa pagtambal.

Segun pa sa GCGMH Blood bank, nga maoy sentro sa pagkuha og dugo gikan sa mga donors, samtang ang atong ospital aduna nay apheresis machine nga makahimo sa pagkolekta sa Convalescent plasma (Conplas) wala pa kita magbansay niana nga procedure.

KADTONG NAKALINGKAWAS NA SA DUHA KA SEMANA NGA COVID-19. Mahimong modonar og dugo, ug pinaagi sa apheresis machine, ilain ang dugo sa plasma nga maoy sakyan sa antibodies nga nakabuntog na sa COVID ug maoy iabono sa lawas sa kasamtangan nga may COVID. Kini nga proseso, the giila nga plasmapheresis, daghan na nga  nataho nga nanga-ayo. (Contributed photo)  

Ang paggamit sa convalescent plasma o opisyal nga gitawag nga Convalescent Plasmapheresis, mao ang pagkuha sa plasma gikan sa dugo sa usa  ka pasyente nga malampuson nga nakabuntog sa COVID.

Ang tawo nga masakit sa COVID ug nakalampus ang lawas sa pagbuntog sa sakit nagpaila lamang nga ang lawas sa pasyente nga na-uli-an gikan sa COVID, nakahimo sa iyang kaugalingon nga antibodies nga nakabuntog sa sakit.

Ang antibodies, o ang natural nga mga sundawo sa lawas nga makig-away sa bisan unsa nga matang sa impeksyon, mahimo nga mamugna sa dinaghan o ginagmay, depende sa panginahanglan sa lawas, ug kini nga mga antibodies magpabilin na sa lawas isip panalipud sa pagbalik sa pagdagsang sa impeksyon.

Kini nga mga antibodies, madala sa dugo sa panahon nga ang usa ka survivor sa COVID, modonar niini.

Pinaagi sa makina sa apheresis, ilain na dayon niini ang dugo, ug ibalik kini sa lawas sa donor samtang ang plasma nga may antibodies nga makapamaayo sa may sakit, mao lamang ang kuhaon ug iabono sa may sakit.

Gikataho na nga daghan na ang mga tambalanan sa kaulohan ang migamit sa Convalescent Plasmapheresis gamit ang dugo sa mga nakalampus sa pagbuntog sa covid.

Sa laing bahin, manatud-an sa mga researchers nga Insik nga ang gatas sa inahan, makatabang sa pagpatay sa kagaw sa COVID-19.

Kini sukwahi sa panudlo sa ubang tinugyanan sa kasanihan nga ang pagpatotoy sa gatas, mahimong makapakatag pa hinuon sa kagaw, bisan pa sa saysay sa World Health Organization nga ang mga inahan, kinahanglang dili mounding sa pagpatotoy sa mga anak.

Ang pagtuon nagapakita nga ang gatas sa inahan nakapatay sa kasagaran nga mga matang sa kagaw sa COVID.

Matud pa sa pagtuon, ang gatas sa inahan, nakababag sa pagpilit sa kagaw sa ginhawaan ug nakapugos sa pagdaghan sa kagaw sa ginhawaan. (rahc/PIA-7/Bohol)

Source: Philippines Information Agency (pia.gov.ph)