TAGBILARAN CITY, Bohol, Sept. 21 (PIA) -- Dili mahimong magtangtang sa face mask ug face shield ang mga trabahante, gawas lamang kon ang pagsul-ob niini, makabalda sa luwas nga pagtrabaho.
Kini ang usa sa mga importante nga unod sa Joint Memorandum Circular (JMC) No 20-04 nga gipagawas sa Department of Labor and Employment (DOLE) ug Department of Trade and Industry, (DTI) isip Supplemental Guidelines on Workplace Prevention and Control of COVID-19, niadtong Agosto 14, 2020.
Segun sa JMC, ang kadtong dagko nga establisemento, gimanduan na usab nga magpahimutang og usa ka isolation facility sa matag 200 ka empleyado, samtang kadtong dili makahimo niini, mahimo nga makigsabut sa usa ka duol nga pribado nga pasilidad o sa barangay aron makagamit sa ilang barangay isolation facility.
Gimanduan usab ang kompanya nga magtanyag og sakyanan nga maghatud-kuha sa mga trabahante diin gituman ang social distancing ug safety protocols didto sa nagluwan sa sakyanan.
Estrikto usab nga ipatuman sa dili dungan nga pagpamahuway ug pagkaon sa mag trabahante ilabi na sa paggamit sa kantina, pagsunod sa usa ka metros nga distansya ug ang pagpabutang og mga sihag nga babag isip pisikal nga ali sa matag tawo sa iyang trabaho-an ug kan-anan, nakasukip sa JMC.
Ang Supplemental Guidelines nagmandu usab sa mga employers sa pagpahiluna sa access sa mga empleyado sa telemedicine services, samtang sa trabaho-an, kinahanglan nga may igo nga pagtuyok sa hangin nga magkinahanglan sa pagpahimutang sa exhaust fans ug mga kahimanan nga mosarap sa hugaw aron limpyo permi ang hangin nga maginhawa.
Sa mga lugar nga gitumbok nga adto lamang makapanigarilyo ang mga empleyado, hinahanglan kining butangan og tagsatagsa ka bayombo (booths) aron dili magka duol.
Ang JMC naglatid sa mas pino nga giya human sa pagpakigkonsulta sa mga health experts, local government units, ug hugpong sa mga negosyante.
Matud ni kalihim Silvestre Bello III sa DOLE, “ang JMC maoy labing komprehensibo ngatamdanan sa kaluwasan ug maayong kasanihan sa mga trabahante sa ilang trabaho-an. Ang hugot nga pagpatuman niining mga health protocols daku na kaato og ikatabang sa pagpakigbugno sa COVID ug sa pagseguro sa proteksyon sa trabahante nga Pinoy.“
Samtang hinayhinay nga miabante ang nasud sa pagsagubang sa hulga sa kagaw, ug sa makahadlok nga epekto sa COVID ngadto sa ekonomiya ug sa komunidad, ang duha ka departamento minglantaw pa panginahanglan nga kini suportahan sa kasamtangan nga mga bag-ong sumbanan aron pun-an ang haw-ang nga naa sa interim guidelines nga una na nga gikapagawas. (rahc/PIA-7/Bohol)
Source: Philippines Information Agency (pia.gov.ph)
0 Comments