Cebuano News: Gikan 50, 73 na ka aktibo nga COVID-19 sulod 4 adlaw

TAGBILARAN CITY, Bohol, Sept. 29 (PIA) -- Sa upat lamang ka adlaw, misulbong ang aktibo nga kaso sa coronavirus disease (COVID-19) Bohol gikan sa 50 ngadto sa 73, Septembre 29 gikan sa Septembre 25.

Kini samtang gikan sa 20 ka mga taga Tubigon nga nagpositibo sa coronavirus disease, napun-an na usab kini og 9,  samtang wala pa gihapon mauli-i ang duha  ka mga health care workers nga natakdan usab sa sakit samtang nagatrabaho sa local nga tambalanan didto.

Labing daghan pa gihapon ang nagpositibo sa Tubigon nga may 31 na ka buok, lakip ang duha ka health workers, samtang gisundan kini sa Candijay nga may 8 na ka aktibong kaso: pulos mga locally stranded individuals (LSI).

NAGKADAGHAN ANG NATAKDAN, MAS DAGHAN ANG NA-AYO. Bisan sa kadaghan sa mga tawo nga natakdan dinhi sa Bohol, mas daghan gayud ang nangauli-an gikan sa sakit, sama sa mga OFWs nga aktibo nga minghuman sa ilang 14 ka adlaw nga kwarantina sa dili pa sila makauli ug tipo na sa ilang mga mahal sa kinabuhi. (PIA Bohol file photo)

Ikatulo na ang San Miguel nga may pito ka kaso nga pulos nangatakdan sa ila ra usab nga mga gikaduol.

Giingon nga ang pito ka kaso sa Tubigon ug San Miguel, pulos local nga pagpanakod, segun sa taho sa Bohol InterAgency Task Force Medical Cluster.

Kasamtangan na usab nga may upat ka aktibong kaso ang Carmen nga pulos mga LSI, tulo ka kaso sa COVID ang Sagbayan ug laing tulo ka kaso sa Pres. Carlos P. Garcia, nga mga bag-ong nauli kon LSI.

May duha  ka kaso ang Tagbilaran City nga pulos Authorized Persons Outside Residence (APOR) samtang laing duh aka kaso sa LSI ang natampo sa Duero.

May tag  usa  ka kaso ang Sagbayan nga OWF, Baclayon, Cortes, Trinidad, Batuan, Tagbilaran City, Dimiao, Anda ug Bien Unido, nga pulos mga bag-ong nahiuli gikan sa mga lugar nga may pagpanakod nga nahitabo.

Kini samtang gipasalig sa BIATF Medical Cluster nga ang mga kaso nmga natumbok karon, ma LSI man og local nga pagpanakod, napailawom na sa estrikto nga pagkwarantina.

Kini nga nga mga kalambu-an nga hatag sa 73 na ka aktibo nga kaso sa corona virus sa Bohol, samtang nagpadangat usab sa 258 ka mga kaso nga karon nalakip na sa listahan sa mga na-uli-an o naayo na sa ilang kahimtang.

Nunot niini, padayon ang aghat sa mga ahesya sa kagamhanan nga nagtutok sa mga panghitabo ngadto sa mga katawhan: pagpabilin permi sa sulod sa balay, magsul-ob og mask kon mogawas, magbutang  sa  dugang panalipod pinaagi sa face shield, magbansay sa permi nga pagpanghunaw, ug magpalayo kon anaa sa mga lugar nga daghang tawo. (rahc/PIA-7/Bohol) 

Source: Philippines Information Agency (pia.gov.ph)