Cebuano News: Medical worker nga ma-COVID, may ECC

DILI TANAN MEDICAL WORKERS. May hinabang nga makuha ang mga medical workers apan kadto lamang nga frontline alang sa COVID-19, segun pa ni Ingrid Yumang sa EE-7. (PIA Bohol/mcuhospital)

CORTES, Bohol, Sept. 24 (PIA) -- Wala man mahi-apil sa listahan sa mga mahimong bayaran sa Employees Compensation Commission (ECC) ang kadtong empleyado nga masakit sa corona virus disease (COVID), may higayon nga mahimo pa gihapon sila nga moclaim sa benepisyo alang sa mga empleyado.

Kini maoy gipasabut sa sa Regional information Officer sa ECC nga si Ingrid Yumang atul sa webinar nga gidumala sa Department of labor and Employment  (DOLE) kabahin sa mga programa sa kagamhanan nga magamit sa mga empleyado niining panahon sa pandemya.

Matud pa ni Yumang, ang ECC usa  ka ahensya nga nakakabit sa Department of Labor and Employment ug maoy naghupot ug nagdumala sa Employees Compensation and Employees Fund.

Gimbuhaton nila ang pagtabang sa mga empleyado nga madisgrasya, masakit o madamay sa aksidente sa ilang pagbuhat sa ilang trabaho sa mga buhatang pribado o publiko.

Ang pundo sa ECC gibayran sa mga employers sa pribadong sector sa tag P10.00 matag buwan kon ang sweldo sa empleyado ubos pa sa P14,750 ug P30 matag buwan kon ang sweldo taas pa sa P14,750, segun pa ni Yumang didto sa webinar.

Sa mga trabahante sa goberno, ang tanan, minghatag og tag P100 matag buwan, wala nay bali kon unsa ka daku o kagamay sa sweldo.

Dugang ni Yumang, adunay listahan sa 32 ka mga risgo nga giatubangs a mga trabahante nga mamahimong mabayran sa ECC kon may mahitab nga aksidente.

Gawas sa 32, aduna pa usab silay giisip nga increased risk theory nga gamiton pagdeterminar kon angayan ba nga makakobra ang trabahante nga ming claim, ilabi na kon kini  nahiapil sa paghjimo sa empleyado sa iyang aktwal nga trabaho, o may koneksyon sa iyang aktwal nga trabaho.

Wala man ang COVID-19 sa 32 ka ka risks nga taban sa trabaho, nasukip kini sa increased risk theory.

Hinuon gitataw niya nga bisan pa niini nga makakuha ang mga medical frontliners sa hinabang kon pananglit matakdan sa sakit nga COVID, kadto lamang mga trabahante nga nahilambigit sa medical frontline sa COVID-19.

Apan usab, bisan kon aktibo nga nagsalmot sa medical frontline, kon ang empleyado natakdan kay nagdanghag sa trabaho, o wala magtamud sa tukmang mga panalipod sa kaugalingon, mahimong invalid ang iyang claim sa tabang. (rahc/PIA-7/Bohol)

Source: Philippines Information Agency (pia.gov.ph)