TAGBILARAN CITY, Sept. 24 (PIA) -- Nipasidaan ang National Bureau of Investigation (NBI) Bohol Field Office sa publiko batok sa pakig-transaksyon sa mga indibidwal nga magpailang representante sa kumpanya nga gitawag og CROWD1 Asia Pacific Inc. nga nangdani karon sa mga Bol-anon sa pagpamuhunan og salapi.
Matud pa ni NBI-Bohol Agent-in-Charge Greg Algoso, ang CROWD1 permanenteng gidid-an sa Securities and Exchange Commission (SEC) sa pag-operate.
Dugang pa ni Algoso nga ang CROWD1 nadiskubrehan sa SEC nga ilegal nga nag-solicit ug nagdawat og investments gikan sa publiko ubos sa modus isip digital marketing business.
Kini human nakadawat ang NBI Bohol Filed Office og tahu niadtong Setyembre 17 gikan ni kanhi NBI Director ug karon mayor sa lungsod sa San Miguel nga si Mayor Virgilio Mendez kalabot sa presensya sa mga indibidwal sa iyang lungsod nga nagpaila isip ahente o representante sa CROWD1.
Gitaho ni Mayor Mendez nga ang mga ahente sa CROWD1 aktibong nangdani sa mga lokal nga lumolopyo sa pagpamuhunan ug salapi ug pagkuha sa promotional packages ug pang-recruit og ubang investors aron makadawat usab og komisyon.
Gipasabot ni Algoso nga epektibo Hulyo 2, 2020, ang SEC nipagawas og permanent cease and desist order batok sa CROWD1 nga nagdili sa maong kumpanya sa pag-solicit ug pagdawat og investments, human nahibaw-an nga ang maong kumpanya nag-operate isip “fraudulent investment scheme consisting of the sale or offer of inexistent securities in the form of investment contracts to the public.”
Usa ka advisory ang gipagawas sa SEC niadtong Mayo 2, 2020 nga nagbutyag nga ang CROWD1 usa ka rehistradong kumpanya apan dili kini otorisado nga mag-isyu ug magbaligya o magtanyag og securities ngadto sa publiko o pagpadayon niining linya sa kalihokan sa negosyo tungod kay wala kini nahatagi og secondary license sa komisyon.
Ang CROWD1 walay registered securities sama sa investments contracts ug wala usab kini secondary license, nga usa ka requirement ubos sa Republic Act No. 8799, o mas giila isip Securities Regulation Code.
Matud pa nga ang CROWD1 nag-solicit ug nangdawat og investments gikan sa publiko pinaagi sa pagtanyag og educational packages nga dili moubos sa P6,000 ug mokabat taman sa P240,000.
Aron makadani sa publiko nga mamuhonan, ang CROWD1 misaad sa mga member-investors og lima ka nagkalain-laing bonus nga mao ang streamline bonus, binary pairing bonus, fear of loss bonus, matching bonus, ug residual bonus gikan sa games ug gambling apps.
Ang CROWD1 nagtanyag usab og pairing incentive nga bayaran og Euros agi og pagdasig sa mga member-investors sa pag-recruit og mga bag-ong miyembro.
Ang NBI-Bohol Agent-in-Charge mitambag sa mga Bol-anon nga magbinantayon gayud sa mga magtanyag og kahigayonang mamuhonan ilabi na ning panahon sa krisis sa ekonomiya. (ecb/PIA7-Bohol)
Source: Philippines Information Agency (pia.gov.ph)
0 Comments