Cebuano News: GSIS, mi-awhag sa mga aktibong miyembro sa pag-nominate sa ilang anak sa GESP

NIINING PANAHON SA KALISUD. Giawhag sa GSIS ang ilang mga sakop nga iduso ang ilang mga anak alangs a tabang sa kagamhanan pinaagi sa scholarship sa kabataan nga nanguskwela, butang nga bukas alang sa mga permanente nga empleyado nga ubos ang kita. (PIA Bohol)  

TAGBILARAN CITY, Sept. 24 22 (PIA) -- Gi-awhag sa Government Service Insurance System (GSIS) ang tanan nilang aktibong miyembro sa pag-nominate sa ilang mga anak sa GSIS Educational Subsidy Program (GESP).

Ubos sa GSP, hatagan sa GSIS og P10,000 ang matag usa  sa mapiling 10,000 ka anak sa mga miyembro niini nga may pinakaubos nga sweldo aron makatabang sa panggasto sa pagtungha sa kolehiyo.

Ning bag-o lang, gi- uswag sa GSIS ang application deadline alang niining programa hangtod Setyembre 30.

Kwalipikadong mo-apply niini ang mga miyembro sa GSIS nga permanent employees, adunay salary grade 24 paubos o kapareha nga lebel niini, ug walay laktaw sa pagbayad sa GSIS loan o kulang nga bayad alang niini og kapin sa tulo  ka buwan.

Angay usab nga naka-enroll karon ang estudyante sa usa  ka four-year o five-year nga kurso sa institusyong giila sa Commission on Higher Education (CHED).

Apan dili kwalipikado ang mga miyembro nga nagdawat na og ubang scholarship o subsidiya.

Alang sa dugang detalye, bisitaha lamang ang GSIS website nga www.gsis.gov.ph o sa opisyal Facebook page sa buhatan nga @gsis.ph.  \Mahimo usab mo-email sa  gesp@gsis.gov.ph o motawag sa GSIS-Bohol (038) 501-0579.  (ecb/PIA7-Bohol)

Source: Philippines Information Agency (pia.gov.ph)