CORTES, Bohol, Sept. 19 (PIA) -- Aron makagamit pa sa pundo nga gipahat alang sa katalagman ug sa pagpakunhod sa epekto niini, ug subay usab sa rekomendasyon sa National Disaster and Risk Reduction Management Council (NDRRMC), gipatas-an pa ni Presidente Rodrigo Roa Duterte ang pagpailawom sa nasud sa state of calamity tungod sa corona virus disease (COVID).
Pinaagi sa Proclamation 1021, nga gilagdaan sa Presidente niadtong Septembre 16, 2020, gidasonan sa pangulo sa nasud ang mandu sa Batakang Balaod nga polisiya sa kagamhanan nga panalipdan ang katungod sa katawhan sa maayong kasanihan.
Kahinumduman nga niadtong buwan sa Marso, gipagawas sa Presidente ang Proclamation 929, nga naghabol sa kinatibuk-ang nasud sa State of Calamity sa unom ka buwan, o hangtud nga kini libkason na, o patas-an pa depende sa sitwasyon.
Sama sa gitagna, ang pagpataas sa Presidente sa State of Calamity, gisaway gihapon sa mga kritko, kay matud pa, nagpaila kini sa kakuwang sa plano sa kagamhanan sa pagsumpo sa sakit nga mananakod.
Hinuon, sama sa gihapon, wala usab magsugyot ang mga tigpanaway sa unsay angayan nga buhaton, nga mas maayo pa kay sa nalantaw sa mga tinugyanan sa NDRRMC.
Segun sa bag-ong Proklamasyon, bisan pa sa hiniusa nga pagpaningkamot sa nasudnong kagamhanan ug mga katawhan sa pagpamaayo pa sa kapasidad sa nasud nga makigbatok sa COVID-19, may namatikdan nga padayon pa gihapon ang pagsaka sa mga kaso niini.
Pinaagi sa pagsandig sa National Disaster and Risk Reduction Act of 2010, ug subay sa opisyal nga sugyot sa NDRRMC, kinsa may mas daghang gihuptan nga kasayuran kabahin sa pagpakigbugno sa nasud sa COVID, gipadayag sa proklamasyon nga ang pagpataas pa sa State of Calamity, maggahum sa nasudnon ug local nga kagamhanan sa paggamit sa ilang napahat nga Quick Response Funds (QRF), segun sa balaod.
Gawas pa nga mahimo na nila nga mas malapig-on pa ang ilang pagpangandam ug pagpakigbatok sa COVID gamit ang ilang QRF aron pugngan ang pagkatag sa kagaw, may gahum pa usab ang mga LGUs sa pagmonitor ug pagkontrolar sa presyo sa mga batakang panginahanglan, ilabi na sa panahon sa pandemya.
Subay niini, pinaagi sa Proklamasyon 1021, giuswag pa ang State of Calamity sa nasud gikan sa Septembre 13, 2020, ngadto na sa Septembre 12, 2021.
Nunot niini, ang tanang ahensya sa kagamhanan ug mga local nga kagamhanan giaghat nga magpadayon sa pagtanyag sa mga hinabang ug magtinabangay sa pagsipong sa mga kahinguhaan aron sa labing dali nga panahon, mapapas na ang hilga sa COVID sa nasud.
Giaghat usab sa Proklamasyon ang tanang ahensya nga nagpatuman sa balaod,nga kauban sa Armadong Kusog sa pagpadayon sa pagpaninguha nga ikapatunhay ang kahapsay ug kalinaw sa mga lugar sa nasud ilabi na kadtong apektado sa pandemya. (rahc/PIA-7/Bohol)
Source: Philippines Information Agency (pia.gov.ph)
0 Comments