Cebuano News: Tamdanan sa mga buntis batok pagtakod sa COVID-19

CORTES, Bohol, Sept. 27 (PIA) -- Dala sa mga pagbag-o nga masinati sa lawas ug sa kapasidad niini nga makigbugno sa impeksyon tungod sa pagkaburos o pagkabuntis, walay angayan nga kagul-an ang babaye sa ilang panglawas ug sa nagtubo nga bata sa tiyan, kon kabahin sa Coronavirus  (COVID-19) ang hisgutan.

Matud pa sa Department of Health (DOH) sa labing bag-ong kasayuran nga nakuha, walay pagdugang sa kakuyaw kon matakdan sa COVID ang mga buntis ug ang iyang gisabak, bisan pa nga tataw nga mahimo siya nga matakdan.

Kon pananglit, dili gayud kapugngan ug matakdan ang buntis sa impeksyon nga magsugod sa ginhawaan o respiratory system, kon maatiman lang og sakto, ug dili usab magpasagad, dili kini daku nga suliran, sumala sa DOH.

Niini, tambag sa ahensya sa kagamhanan nga nagtutok sa kasanihan, dugangan ang pag-amping sa kaugalingon ug sa gisabak nga naa sa sabakan batok sa COVID-19.

Dugang aghat sa DOH, kon nakasinati sa mga timailhan ug simtomas sa COVID-19 ug uban pa nga sakit, tawag dayon sa local nga Barangay Health and Emergency Response Team (BHERT) o sa labing duol nga health care provider ug tamdi ang ilang mga sugyot ug tambag.

Kini nga mosunod ang angayan nga bantayan sa babaye nga buros ug sa iyang mga katipon sa balay aron mapamalipdan ang kaugalingon ug  ang gisabak:

• Panalipdan ang kaugalingon sa sakit punaagi sa pagpanghunaw sa kamot bisan sa 20 segundos subay usab sa tamdanan sa DOH, sa 20 segundos o mas taas pa, gamit ang sabon ug tubig.
• Batasanon permi ang pagpahilayo sa distansya nga 6 ka piyes o us aka metros samtang maglikay una sa mga lugar nga adunay daghang tawo.
• Likayan gayud nga kakahikap sa mata, ilong, ug baba.
• Kat-onan ang husto nga paagi sa pag-ubo, ug batasanon ang sakto nga paagi sa pagtipig ug paglabay sa tissue nga inubhan.
• Kung may mga sintomas sa hilanat, ubo, o paglisud sa pagginhawa, dili mapgpanuko sa pagpatan-aw sa mga propseyonal nga health workers aron may medical nga tabang nga makuha.
• Sa dili pa moadto sa us aka ospital, clinic o health care facility, makigkita una sa usa  ka doctor sa labing duol nga health center.
• Dili una magsuroysuroy ug dili mogawas kon dili importante kaayo ang paggagawas, o pagdawat sa mga bisita.
• Kung ang kapikas sa kinabuhi, o ang kabanay may COVID-19, o may mga sintomas nga nasinati niini, dili siya angay nga moduol. Ayaw usab sila pakuyoga kon moadto ka sa ospital.
• Kon gikinahanglan gayud og tawo nga maotiman sa pasyente, alang sa mga outpatient nga pagtanda sa ospital, angayan lamang nga mag-inusara ug dili magpakuyog og lain. (rahc/PIA-7/Bohol)

Source: Philippines Information Agency (pia.gov.ph)