CORTES, Bohol, Sept. 22 (PIA) -- Hangtud kanus-a man nga ang usa ka tawo isipon nga Suspect, Probable o Confirmed nga may kaso sa Corona Virus Disease (COVID)?
Segun sa kasayuran ga gipaambit sa Department of Health, isipon ang tawo nga suspect (gidudahan nga natakdan) kun aduna siya’y gipamati nga susama sa kalintura o influenza-like illness (ILI) nga may hilanat nga naa sa 38C ug ubo o sakit sa tutonlan.
Isipon siya nga gidudahan ilabi na kon siya nagpuyo o mingbyahe sa usa ka lugar nga may gikataho nga local nga pagpanakod-takod sa COVID-19 mga 14 ka adlaw sa wala pa manggawas ang mga simtomas o timailhan sa iyang sakit nga gipamati.
Dudahan gyud siya kon may gikaduol ug gikasagol siya nga usa ka tawo nga kompirmado gayud nga may COVID o bisan sa tawo nga mahimong (probable) may COVID, sulod sa mga 14 ka adlaw sa wala pa makagawas ang mga simtomas nga iyang gibati.
Dudahan usab siya kon gihilantan, giubo ug naglisud sa pagginhawa ilabi na gayud kon nahiapil sa mosunod nga mga mosunod: nagpanuigon og 60 pataas, may daan na nga gipamati nga sakit sa lawas, buntis ilabi na kon lisud ang iyang pagsabak, o aktibo nga health worker, ug kalit lang nga may gibati nga lahi ra sa baga ug may grabe nga mga simtomas nga dili gyud matumbok ang hinungdan mao nga kinahanglang ipa-ospital.
Sa lain nga bahin, isipon nga nahaapil sa mga probable o possible nga natakdan kon, labing una, nahi-apil sa mga gidudahan ug wala pa makuha ang resulta sa COVID testing ug mas labi na gayud kon ang naghimo sa testing, dili opisyal nga laboratoryo nga tighimo sa RT-PCR testing.
Posible usab nga natakdan kon kalit lang nga may gibati sa baga ug may grabe nga mga simtomas nga dili matumbok ang hinungdan, maong kinahanglang ipa-ospital.
Sa katapusan, kompirmado o confirmed ang pag-isip sa us aka tawo, kon naha-apil sa may mga positibo nga resulta sa RT-PCR testing nga gigamit aron pag-ila sa kagaw sa COVID nga naa na sa sulod sa lawas. (rahc/PIA7/Bohol)
Source: Philippines Information Agency (pia.gov.ph)
0 Comments