SYUDAD SANG ROXAS, Capiz, Septyembre 3 (PIA) -- Ginpasiguro ni Frankie Dordas nga Provincial Statistics Officer sang Philippine Statistics Authority sa Capiz nga ang tanan nga 848 ka mga enumerators sa bug-os nga probinsya para sa 2020 Census of Population ang Housing ang magasunod sa mga kinahanglanon nga health protocols sa ila pagpatigayon sang data gathering sang populasyon kag mga panimalay humalin Septyembre 1 tubotb 30 karon nga tuig.
Ang nasambit nga pasalig ang kasunod man sa hingyo ni Dordas sa publiko sang suporta kag kooperasyon sa patigayunon nga house-to-house nga census.
Nahibaluan nga ang tagsa ka enumerator sa Roxas City ang may target nga kapin 20 ka mga panimalay samtang ang nabukid nga banwa sang Tapaz nga mga enumerators ang dapat makalab-ot sang 14 ka mga panimalay tagsa ka adlaw nga pagpatigayon sang survey.
Ang enumerators sa nabilin nga 15 ka mga kabanwahanan sa probinsya ang nagakadapat nga makalab-ot sang 16 ka mga panimalay sa tagsa ka adlaw nga pag-survey.
Gindugang pa ni Dordas nga kalakip man sa paga-isipon sa pag-survey ang mga katawhan sa mga prisohan, ospital, kampo sang militar kag iban pa nga nalakip sa "institutional population sources" agud nga malakip gid ang tanan sa pag-isip sang populasyon.
Magluwas sa mga enumerators, ang PSA ang nag-hire man sang 171 ka mga team area supervisors kag 34 ka mga census area supervisor para sa isa ka bulan nga hilikuton.
Apang ginklaro ni Dordas nga mahimo maapektohan ang timeline sang census ukon data gathering bangud sa mga localized lockdown sa probinsya.
Ang probinsya sang Capiz ang may populasyon nga 761,384 nga nagataas sang 1.08 porsyento tagsa ka tuig base sa resulta sang 2015 Census of Population. (JBG/AAL/PIA Capiz)
Source: Philippines Information Agency (pia.gov.ph)
0 Comments