SAN JOSE, Antique, Septyembre 3 (PIA) -- Padayon ang pagtugro kang bulig ni House Deputy Speaker kag Antique Lone District Representative Loren Legarda sa mga mangingisda sa probinsya kang Antique bilang ana nga pagtamod sa manggad kang palibot kag pagta-o serbisyo sa mga pumuluyo.
Sa sangka press release, ginpahayag ni Legarda nga ang probinsya may bastante nga manggad sa kadagatan kag raku nga mga Antiqueños nagadepende sa coastal biodiversity para sa andang pagkaon kag pangabuhi.
Ana man ginhambal nga nagakadapat lamang ang pagta-o kang bahol nga suporta sa mga mangingisda pinaagi sa mga serbisyo kag programa agud maamligan ang andang parangabuhi-an kag mapasigurado ang duro nga suplay kang pagkaon sa Antique.
Suno sa report, walo ka mga fishery projects kang Bureau of Fisheries and Aquatic Resources (BFAR), ang ginasuportaran ni Legarda.
Nalakip kadya amo ang post-harvest kits, fish clads, fish carts, fish preservation technologies, input assistance ka mga seaweed growers, palyaw, tilapia culture, kag catfish culture.
Sa mga naglinigad nga mga tinuig, 100 ka mga benepisyaryo halin sa kabanwahanan kang Sebaste, Tibiao, Pandan, San Jose kag Sibalom ang nakabaton man kang post-harvest equipment.
Dugang pa, may ginbahin man nga pondo sa BFAR para sa pagtugro kang fishing gears sa mga mangingisda sa probinsya.
Sa pihak nga bahin, 50 ka mga benepisyaryo sa banwa kang Culasi, Hamtic, Pandan kag San Jose ang makabaton kang assistance para sa mga fry collectors.
Samtang, 40 ka mga palyaw naman ang igapanghatag sa Anini-y, Barbaza, Belison, Bugasong, Culasi, Hamtic, Patnongon, kag Tobias Fornier. (JSC/LML/PIA6 Antique)
Source: Philippines Information Agency (pia.gov.ph)
0 Comments