Hiligaynon News: DA nagpaandam sa LGUs, mangunguma batuk sa army worm

SYUDAD SANG ILOILO, Septyembre 17 (PIA) - - Nakapakig-angot na ang Regional Crop Protection Center (RCPC) sang Department of Agriculture 6 sa mga lokal nga panguluhan sa probinsya sang Iloilo para i-alerto  sang posible nga pagpanghalit dala sang army worms.

May namonitor na nga infestation sa banwa sang Miag-ao kag Tubungan kag may report man nakitaan sang peste sa banwa sang Maasin, pahayag ni Ryan Rasgo, hepe sang DA 6- RCPC.

Sa Miag-ao, ang infestation nakita sa 21 ektariyas nga talamnan sa anom ka barangay sang banwa nga ginalakipan sang Bagumbayan, Ticdalan, Cawayan, Igpandan, Igbugo kag Igcabitoon.

Ginpahayag ni Rasgo nga may nagpadulong nga hubon sa banwa sang Miag-ao sining karon lang agud magpatigayon sang validation kag assessment sang kalubha sang kahalitan kag nagdala sang mga kemikal kag biocontrol agents agud makontrol kag mapatay ang army worms.

Gindugang sini nga ang Tigbauan ang nahatagan na sang ginarekomendar nga pesticides kag biological agents batuk sa peste nga nadetect sa 10 ka ektarya sang talamnan sa banwa.

Ginahingyo ni Rasgo ang mga mangunguma kag lokal nga mga agricultural worker nga pabaskugon pa ang ila monitoring kag surveillance sa mga pagluntad sang army worms bangud sa matuga nga kahalitan sini sa mga pananom, partikular sa palay, sa diin ang iban sa karon malapit na nga anihon sa pila ka bahin sang probinsya.

Ang army worms makatalagam nga peste nga maka-utod sang dahon kag uhay sang humay halin sa puno. Makahalin-halin ini sila sa isa ka uma padulong sa isa ka uma kag makahalit sang tanom.

“Ang panahon sa karon, sa diin malaka lang ang ulan kag mainit, ang conducive para sa army worms to thrive,” suno kay Rasgo.

Ginpanugyanan sini ang mga mangunguma nga i-report gilayon sa ila natungdan nga mga lokal nga panguluhan kon may ara sila problema natuhoy sa peste agud ini ang maaksyunan gilayon.

Mahimo man sila magpakig-angut sa RCPC 6 pinaagi sa telepono (033) 329-6958 ukon mag-email sa da rcpc@yahoo.com. (JSC/laf/PIA6 Iloilo)
 

Source: Philippines Information Agency (pia.gov.ph)