Cebuano News: Ampo, sunod sa mga lagda nga gilatid sa kagamhanan

TAGBILARAN CITY, Bohol, Oct. 16 (PIA) -- "Ampo lang gyud ta permi nga mapadali ang pagpahibalik nato sa normal ug sa kanunay, sunod sa mga gilatid nga sumbanan sa kagamhanan aron kalikayan ang pagtakod sa coronavirus disease (COVID)."

Kini maoy labing bag-o nga panawagan ni City Mayor John Geesnell Yap II nga iyang  gipalanog, dili lamang sa mga konstituwente sa Tagbilaran apan lakip na usab sa tibuok nasud nga nahingawa sa pagdagsang sa sakit nga mananakod.

Didto sa Daily Network Briefing nga gihimo sa Radyo Pilipinas uban ni Presidential Communication and Operation Office Secretary Jose Ruperto Martin Andanar, gibutyag ni Tagbilaran City Mayor Yap nga gawas sa pag-ampo, nagpasalamat siya sa nasudnong kagamhanan tungod sa paspas niini nga pagpagawas sa mga aktibong polisiya ug sa sakto nga pagdumala sa mga kaso sa COVID.  

KAUBAN SA MGA NEGOSYANTE. Usa sa mga daku nga nahimo sa mga negosyante sa syudad mao ang pagpakigtambayayong aron makahatag og face mask, face shields subay sa participative governance nga mao usab ang usa sa mga hinungdan nga nadughit na usab sa syudad ang dungog isip Most Business Friendly City sa Category 3 bisan pa sa panahon sa pandemya, segun pa ni Mayor Yap. (PIA Bohol)  

Sa kahimtang sa Tagbilaran, gipasabut ni Mayor Baba Yap nga ang syudad maoy bugtong nga syudad sa Bohol ug dinhi ang labing baga nga populasyon sa katawhan.

Tungod niini, hugot gyud ang gibuhat sa syudad nga pagpanalipod nga dili makasulod ug kon nia na man ugaling, dali nga makahon ang mga lugar nga gipuy-an sa mga nabiktima aron dili makalanat ang sakit.

"Sa kanunay, nagsunod kita sa mga lagda sa Inter Agency Task Force on the Management of Emerging Infectious Diseases (IATF), mao nga alang sa mga taga-Tagbilaran nga mouli-ay pa," may hangyo ang mayor.

"Pasensya na sa estrikto nga kwarantina, sanglit ang Tagbilaran may labing baga nga populasyon, kinahanglan kita nga magpahiluna gayud sa sistema sa containment ug mandatory nga isolation," pasabut ni Mayor Yap.

Gawas pa niana, matud ni Yap, “pugos gihapon ang testing sa tanang mo-uli sa Tagbilaran, ma Overseas Filipino Worker, Locally Stranded Individual ug Authorized Person Outside Residence.”

“Sa ika lima ngadto sa ila pito ka adlaw sa ilang pag-abut dinhi, pugos na nga RT PCR nga libre alang sa tanan nga gipailawom sa 14 ka adlaw nga kwarantina,” matud ni Yap.

Kini tungod kay dili gusto ang syudad nga may mohuman sa kwarantina nga mokalit lang og ka positibo, segun pa sa ka 6 o pito ka hitabo na dinhi sa syudad.

“Wala kita’y buhian sa kwarantina nga dili magpa RT PCR, aron mapanalipdan ang Tagbilaran, testing lang gyud,” sumpay niya.

Bisan pa sa pag-ampo ug estrikto nga pagsunod sa lagsa sa IATF, gipahinumdom gihapon sa batan-on nga mayor nga batasanon na ang pagsul-ob sa face mask, face shield, pagpanghunaw permi, u gang pagtamud sa social distancing aron makalikay sa pagtakod sa sakit. (rahc/PIA-7/Bohol)

Source: Philippines Information Agency (pia.gov.ph)