TAGBILARAN CITY, Oct. 29 (PIA) -- Buksan na sa lalawigan sa Bohol ang pultahan niini alang sa mga lokal nga turista sugod sa Nobyembre 15, 2020.
Apan kinahanglang mag-negatibo sa coronavirus disease (COVID-19) ang mobisitang lokal nga turista sa lalawigan.
“Magbubukas na po para sa turismo ang island paradise ng Bohol mula po a-kinse ng Nobyembre,” matud pa ni presidential spokesperson Harry Roque sa gipahigayong press briefing sa Hennan Resort sa lungsod sa Panglao adlaw’ng Martes, Oktubre 29.
Samtang si Gobernador Arthur Yap miingon nga ang mga turistang nagplano nga mobisita sa lalawigan kinahanglang mo-presentar og 72 ka oras nga negatibong resulta sa reverse transcription-polymerase chain reaction (RT-PCR) sa COVID-19 sa dili pa mosulod sa Bohol.
Matud pa ni Yap nga kun may balidong negatibo nga PCR test result sa COVID-19, mahimo nang mo-rehistro ug mahatagan kini og quick response (QR) code. Magamit kining QR code sa pagparehistro ug sa pagpa-book kun asa nga awtorisadong establisyemento.
“So if you have a valid negative PCR test result to COVID, then you can register, let us know about that, mabibigyan kayo ng QR code. You will use that QR code to register then you can now book your stay with accredited establishments,” (Mao nga kon aduna kay negatibo nga resulta sa RT-PCR, mahimo kang morehistro, sayri kami aron mahatagan ka og QR Code. Kining QR Code magamit na aron marehistro ka ug mahimo ka nang makakuha og mga kwarto alang sa imong pagpuyo sa mga akreditado nga establisemento), pasabot pa sa gobernador.
Matud pa nga ang mga interesadong lokal nga turista mahimong mo-rehistro sa ilang QR codes pinaagi sa tourism.bohol.gov.ph.
Gipasabot usab ni Yap nga wala una gitugot ang mga ‘do-it-yourself trips’ apan ang lokal nga kagamganan mohatag og ‘guided itineraries’ ngadto sa mga mobisita sa Bohol. (ecb/PIA7-Bohol)
Source: Philippines Information Agency (pia.gov.ph)
0 Comments