DAKBAYAN SA BUTUAN, Oktubre 2 -- Hugot nga ipatuman ang organikong pagpanguma sa syudad sa Cabadbaran ning probinsya, human kini nagpalabang sa ilang City Ordinance No. 024-2020 “Promoting Organic Agriculture and Providing Tax Incentives Thereof ” nga diin giaprobahan ug gideklara nga balido sa Sangguniang Panlalawigan sa ilang ika-58th sesyon regular.
Ang tinguha sa maong ordinansa nga gipangamahanan ni Sangguniang Panlungsod Member Alan M. Asio nga magdasig sa tanan nga lokal nga mga mag-uuma ug sa uban pang mga hingtungdan, nga magpraktis alang sa standard nga teknolohiya sa organikong pamaagi, para sa maayong kalidad ug epektibo nga pagpanguma ug aron maminusan ang polusyon nga maoy moguba sa kinaiyahan, ingon man usab nga mapugngan ang pagkahurot sa natural resources sulod sa lokalidad. Pinaagi niini mapanalipdan usab ang kahimsog sa atong mag-uuma ug sa mga mamalitay sa ilang mga abot.
Nakalatid sa ordinansa nga ang mag-uuma nga naggamit sa organikong pamaagi, luwas sa pagbayad sa buhis ug uban pang nagkalain-laing bayranan nga gisingil sa syudad apan dili molapas sa unom ka tuig gikan sa pagsugod sa operasyon.
Giingon usab sa ordinansa, ang bisan kinsa nga tawo nga makalapas niini adunay ipataw nga multa nga usa ka libo ka pesos o pagkabilanggo nga dili molapas sa napulo ka adlaw sa pagbuot sa korte ug dugang pa niini, mawala ang mga benepisyo nga gihatag ubos niini nga ordinansa.
Kini nga lakang alang sa kinatibuk-ang kaayohan sa syudad sa Cabadbaran nga nahisubay ilalum sa Republic Act No. 10068, “An Act providing for the Developmnet and Promotion of Organic Agriculture in the Philippines and Other Purposes.”
Sa pagpangamahan ni Provincial Board Member Vigilio R. Escasiñas, Jr., tsirman sa Committee on Agriculture and Agrarian Reform gideklara nga balido ang City Ordinance No. 024-2020 pinaagi sa Sanggunian Resolution No. 404-2020 atol sa ilang sesyon regular. (Prisilina P. Amoroso, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments