TAGBILARAN CITY, Oct. 20 (PIA) -- Nanawagan ang Department of Education (DepEd) sa publiko nga likayan ang ginahimong paglambigit sa mga insidente sa paghikog sa mga pagsuway nga dala sa gipatuman nga blended learning.
Sa gipagawas nga pahayag sa DepEd, giingong nakaabot na kanila ang mga pagsuway nga dala sa sitwasyon karon kauban na ang masulob-ong balita nga may mga magtutudlo ug tinun-an ang namatay taliwala sa krisis.
Matud pa sa DepEd nga tumang nagbangotan ug nipaabot og simpatiya ang departamento sa mga nailo.
Giseguro sa buhatan nga padayong nakig-alayon ang mga field offices niini sa mga pamilyang nahabilin aron mapaabot ang diha-diha dayong tabang ug suporta.
Hangyo sa DepEd sa publiko nga irespeto ang pribadong kinabuhi sa mga pamilyang nahabilin ug apil na usab ang paglikay sa paghisgot –hisgot sa hinungdan sa pagkamatay.
Nanawagan ang DepEd nga ihunong ang pagkunekta sa mga insidente sa paghikog sa mga modyul o sa distance learning.
Sa tinuod matud pa sa departamento nga base sa report gikan sa pulisya ug pahayag sa mga pamilya, ug base sa mga inisyal nga imbestigasyon sa mga kaso, wala sa bisan asang insidente ang nagtumbok sa distance learning isip nag-unang hinungdan sa pagkamatay sa pipila ka magtutudlo ug estudyante.
“Patuloy na nakikipag-ugnayan ang Kagawaran sa mga guro, kawani, at mga mag-aaral upang sila ay mabigyan at mahatiran ng mga nararapat na serbisyong pang-mental na kalusugan at psychosocial,” matud pa sa pahayag sa DepEd. (ecb/PIA7-Bohol)
Source: Philippines Information Agency (pia.gov.ph)
0 Comments