SAN JOSE, Antique, Oktubre 19 (PIA) -- Sangka geological quadrangle mapping sa bahin kang Sebaste quadrangle ang ginapatigayon sa karon kang Department of Environment and Natural Resources – Mines and Geosciences Bureau (DENR-MGB 6) tubtub sa katapusan kang Oktubre.
Ang dya nga hirikuton kabahin kang lihok kang gobyerno sa pagbuhat kang mga geologic maps ukon mapa para sa mga lugar sa rehiyon nga wara pa kang nasambit nga mapa.
Ginpahayag ni Dr. Leilanie Suerte, supervising geologist kang DENR-MGB 6, nga ang geological quadrangle mapping nga napahamtang sa Sebaste Quadrangle ang nalakipan kang kabanwahanan kang Culasi kag Sebaste.
Samtang, kabahin man kadya ang mga kabanwahanan kang Madalag, Malinao kag Ibajay sa probinsya kang Aklan.
Suno sa geologist, importante ang geologic maps sa pagpatigayon kang geologic surveys agud maman-an ang geohazards, hydrological, kag georesources kang sang ka lugar.
“Sa Comprehensive Land Use Plan (CLUP), kinahanglanon nga maman-an ang mga sahi kang bato kag mineral nga makita sa mga banwa. Maman-an mo ray-a paagi sa geologic maps kun sa diin rugya mo makita ang sahi kang mga bato kag mineral lakip na ang paghiwat kang hazard mapping,” ang pagpaathag ni Suerte.
Dugang nya, makatugro man kang bulig ang geologic maps sa mga local government units sa andang pagpatigayon kang development planning. (JSC/LML/PIA6 Antique)
Source: Philippines Information Agency (pia.gov.ph)
0 Comments