Cebuano News: 11 ka kaso sa COVID-19 sa Bohol nauli-an Nob 4

TAGBILARAN CITY, Bohol, Nov. 4 (PIA)  -- Napulo ug usa  ka tawo nga nagkapositibo sa corona virus disease (COVID-19) ang na-uli-an sa usa lamang ka adlaw, kini segun sa taho sa Bohol Inter Agency Task Force on the management of Emerging Infectious Disease (BIATF-EID), sa ilang inadlaw nga Case Map sa nahisgutang sakit.

Niadtong Nobyembre 3, gikataho nga may 127 ka mga kaso dinhi sa Bohol, hinuon, dili tanan niini mga Bol-anon, kay may mga sundawo nga naghimo sa bansaybansay sa pagpanggubat ang nahitapnas sa Bohol ug tua didto sa kampo sa Lino I Chatto sa Cabulijan Tubigon.

NAKA-ULI NA APAN MAHIMONG MAOY NAGDALA SA SULIRAN. Nakauli na ang libo-an nga mga LSI nga nangatanggong gawas sa Bohol sukad pagsugod sa pagpanghasi sa trahedya apan sila usab karon ang gitutokan sa mga tinugyanan sa rason nga sila ang gisakyan sakagaw aron makasulod ngahi sa Bohol. (rahc/PIA-7/Bohol)

Pagka Nobyembre 4, 2020, 116 na lang ang nagpositibo sa kaso.

Nag-una na ang Tubigon sa kadaghanon sa kaso, kini dala sa 53 ka mga sundalo nga Authorized Persons traveling Outside Residence (APOR), usa  ka health care worker ug usa pa ka residente nga naghatud sa kinatibuk-ang kadaghanon sa nagpositibo didto ngadto na sa 55.    

Apan sa Sierra Bulones diin may natala nga 23 ka positibo nga kaso niadtong Nobyembre 3, 10 ka aktibong kaso sa local transmission ang nanga-uli-an na sa pagka Nobyember 4.

Sa siyam usab nila  ka positibo nga nanguli nga Overseas Filipino Worker (OFW), walo na niini ang nagpabiling positibo samtang na-uli-an na sa sakit ang usa, hinungdan nga sa labing bag-ong ihap, 12 na lang ang nagpositibo didto ug padayon kining naka-isolate ug giatiman sa mga tinugyanan sa kasanihan.

Siyam pa gihapon ang kaso sa nagpositibo sa Candijay, unom ka kaso ang gitutokan sa Loon, lima sa Talibon, upat sa San Miguel, upat sa Pilar, tulo sa Baclayon, duha sa Carmen, duha sa Catigbian, duha sa Dauis, ug duha usab sa Ubay.

Sa katapusang ihap, niadtong Nobyembre 4, may tagsa  ka kaso ang Anda, Garcia Hernandez, Loboc, Alburquerque, Antequera, Bilar, Getafe, Trinidad ug Bien Unido, nga nagtumod sa mga kaso sa Bohol ngadto na sa 116, sa adlaw sa pagbalik sa trabaho human  sa holiday sa CPG Day.

Sa labing bag-o nga kasayuran, 19 na ang local transmission gikan sa 29 sa imaging adlaw, samtang ngapadayon pa gihapon ang hulga sa paglihok sa mga kaso hangtud nga ang pagpanawat sa mga LSI, OFW ug APOR nagsige pa gihapon.

Niini, bisan kon nagkagamay na ang local transmission, giawhag pa gihapon ang tanan nga kon mahimo, magpabilin una sa mga balay, ug magsul-ob og mask kon gikinahanglan nga mogawas.

Sa gawas sa balay, kinahanglan usab nga magbatasan sa pagpanghunaw permi ug sa pagpaneguro nga nakadistansya sa isig  ka tawo aron dili maabut sa laway nga maoy mahimong hinungdan sa pagpanakod sa sakit. (rahc/PIA-7/Bohol)

Source: Philippines Information Agency (pia.gov.ph)