IPIL, Nob 25 (PIA) - Ang Department of Agriculture ( DA9 ) nagpahigayon ug rice information caravan (InfoCar) sa lungsod sa Malangas, lalawigan sa Zamboanga Sibugay ning bag-o pa lang.
Ang InfoCar gisalmutan sa mga nagkalain-laing ahensya sa kagamhanan sama sa Philippine Crop Insurance Corporation (PCIC), National Food Authority (NFA) ug Philippine Rice Research Institute (PhilRice) isip kabahin sa kasaulugan sa National Rice Awareness Month (NRAM).
Usa usab kini nga kahigayonan nga madala nila sa mga lokal nga mag-uuma ang awareness year’s theme nga mao ang “Grow Local, Buy Local, Eat Local”. Diri usab hisgutan ang rice production management ug ang DA Rice Crop Protection Center (RCPC ) ug tukma nga paggamit sa pestesidyo ug ang girekomenda nga paggamit sa bio-control agents.
Ang buhatan sa PCIC nagdapit sa mga lokal nga mag-uuma nga mopahimulos sa insurance program tungod sa managsunod nga pagsulod sa bagyo sa nasud diin apektado usab ang maong lungsod sa kusog nga mga ulan ug baha. Samtang ang NFA padayon nga nagpahibalo sa ilang programa nga palay procurement program (PPP).
Gipagawas sa mga lokal nga mag uuma ang ilang sentimento sa ubos nga kantidad pagpalit sa ilang mga palay luyo sa pagdaut sa panahon, ilabi na ug ting-ulan nga apektado kaayo ilang panginabuhian.
Ang NFA napahibalo sa mga mag uuma nga ang maong ahensya mopalit sa Php 19.00 matag-kilo (clean and dry ) ug ilang gipasabot nga una sa ilang buffer stocks ang pagdawat sa clean and dry palay.
Ang DA-9 naghatag ug 400 packs nga Trichogramma Japunicum, 100 packs sa Beauveria Basiana, ug 125 packs nga Metarhizium Anisopliane nga mohaum sa lima ka ektarya.
Mapasalamaton si Municipal Agriculturist Troadio Magallanes sa gihimo nga InfoCar, ug sa tanan rice information technologies ug project interventions nga gitanyag sa DA ug ubang ahensya tungod kay nakahatag ug maayong resulta sa agricultural production sa maong lungsod nga miabot sa 50%. Gitak-opan ang maong kalihokan pagpanumpa sa rice pledge sa mga partisipante ug misaad nga mamahimong responsable nga rice consumer ug ang pagpatuman sa higpit nga health protocol sa COVID19 sama sa pagsuot ug face mask, ug mag-obserbar sa social distancing panahon sa ilang mga programa. (GCC/JPA/PAVM- Zamboanga Sibugay)
Source: Philippines Information Agency (pia.gov.ph)
0 Comments