TAGBILARAN CITY, Nov. 9 (PIA) -- Siguradong gukdon na usab ni Presidente Rodrigo Duterte, pinaagi sa bag-ong gitukod nga ‘expanded task force’ ang mga ghost importers isip parte sa gihingosgang gyera batok sa “systemic corruption” sa gobyerno ilabi na sa Bureau of Customs (BOC).
Kini ang giingon ni Senador Christopher “Bong” Go taliwala sa di mahuman nga isyu sa korapsyon ug iregularidad sa BOC.
“Huwag kayong mag-alala, darating din ang Pangulo dyan. Meron na tayong expanded task force na handa mag-imbestiga, mag-prosecute, mag-rekomenda ng suspensions, mag-lifestyle check, mag-audit at ipakulong ang mga mapatunayang nagkasala,” (ayaw lang mo og kabalaka, moabut ra gihapon ang Presidente diha. Aduna na kitay expanded task force nga andam mag-imbestigar, maglutos ug magrekomendar sa pagsuspendir, mag lifestyle check, mag-audit ug magpabilanggo sa mga mapamatud-ang nakasala), matud pa ni Go.
Nipasidaan pa si Go nga kun gikinahanglan, basahon ni Presidente Duterte ang mga pangalan aron silotan ug mapasakkan og kaso ug mahibaw-an sa publiko ang mga kabuang niiing mga tawhana.
Naghisgot usab ang senador nga nasumiter na kang Presidente Duterte ang pangalan sa mga nalambigit sa korapsiyon sa BOC.
Kahinumdoman nga ning bag-o lang, girekomendar sa National Bureau of Investigation (NBI) ang pagsang-at og kasong kriminal ug administratibo batok sa mga opisyal sa BOC nga nalambigit sa mga giingong mga anomaliya aron mapasakaan og kaso sa paglapas sa Anti-Graft and Corrupt Practices Act.
Ang maong mga opisyal gikatahong nalambigit sa akreditasyon sa dili moubos sa unom ka ghost importers.
Samtang gipahayag ni Go ang pasalig sa administrasyon nga maghatod og ‘corruption-free government services’ pinaagi sa mas gitarung nga proseso sa pagnegosyo sa nasud.
Matud pa ni Go nga may Ease of Doing Business nga ang tumong niini mao nga mapadali ang proseso sa paagi nga walay korapsyon. (ecb/PIA7-Bohol)
Source: Philippines Information Agency (pia.gov.ph)
0 Comments