Cebuano News: Igbabayad sa huwam sa GSIS sa Nov, Dec, dili una tinglon

TAGBILARAN CITY, Bohol, Nov. 11 (PIA) -- Alang sa mas malipayon nga Pasko bisan pa sa epekto sa pagnihit ug kalisud dala sa corona virus disease, gibutyag sa Government Service Insurance System (GSIS) nga subay sa Bayanihan To Recover as One Law (Bayanihan 2), ilang ipatuman ang duha  ka buwan nga lugway sa pagbayad sa mga huwam gikan sa ahensya.

Niini, walay interest sa balayranan sa loan kay nagtangag na man daan kini og interest, ug wala usay madugang sa interest sa nahibilin nga panahon nga bayaran ang loan.  

GAWAS SA MORATORIUM. Gibutyag usab ni Edna Elicot, Bohol Field Office Head sa GSIS Bohol ang GFAL Educational Loan nga alang sa kolehiyo diin ang sakop sa GSIS ug ang iyang anak nga gastohan mopirma sa P100K nga educational loan matag tuig sulod sa lima ka tuig ug bayaran kini kon makahuman na ang estudyante nga gigastohan. (PIA Bohol) 

Ang programa nga gihinganlan og Bayanihan 2 Loan Moratorium Program, makabenepisyo sa mga aktibo ug bisan gani ang dili aktibong sakop sa GSIS nga may nagpabiling gibayran nga mga huwam, sa bisan hain man niini nga mosunod.

Segun pa sa GSIS Memorandum No 10, series of 2020, lakip sa mga balayranan sa mosunod nga loans ang dili usa mobayad sulod sa Nobyembre ug Disyembre 2020: kadtong may Consolidated Loan o Multi-Purpose Loan, GSIS Financial Assistance Loan (GFAL), Educational Assistance Loan II (EAL II), Emergency Loan, Regular Policy Loan, Optional Policy Loan, Home Emergency Loan Program (HELP), Deed of Conditional Sale (DCS) / Real Estate Loan (REL).

Apil usab ang may bayranan sa Pension Loan, Pensioner’s Emergency Loan, Pensioner’s Restructured Loan, Program for Restructuring and Repayment of Debt (PRRD), GSIS Computer Loan, GFAL Educational Loan, uban pang mga programa sa pahuwam sama sa Assistance Loan (EAL), Stock Purchase Loan (SPL) ug sa Study Now, Pay Later (SNPL).

Giniyahan sa GSIS Memorandum No. 10, series of 2020, ang Bayanihan 2 Loan Moratorium maglangkob sa duhaka buwan nga balayranan: sa Nobyembre ug Disyembre 2020, aron usab may dyutay nga magamit ang mga sakop alang sa ilang banay aron mas malipayon ang Pasko sa ilang balay, dugang ni Elicot.

Gani, segun pa sa GSIS, sanglit ang pasko alang man sa tanan, dili na kinahanglan pa sa mga sakop sa GSIS nga may mga balayranan pa nga mo-apply sa loan moratorium, kay automatic kini alang sa tanang sakop.

Hinuon, kadtong gusto nga dili mo-apil sa bali og duha ka buwan nga lugway sa balayranan, mahimong ilang personal na lang nga ibayad sa GSIS ang ilang mga amortizations.  

Kini human nila madawat ang napadaku nga makobra sa duha  ka buwan kay ilakip na man niini ang ibayaray unta sa GSIS apan dili una tinglon alang sa Nobyembre ug Disyembre.

Epekto hinuon niini, sugod sa Enero 2021 dili na magkinahanglan pa ang GSIS nga mopahibaw, kau automatic na usab kini niini ibalik na ang pagtingil sa mga napaundang nga balayronon, segun pa ni Elicot, didto sa Kapihan sa PIA.

Kini sanglit ang duha ka buwan nga lugway ipa-inat lang usab sa katas-on sa lanat sa una nga loan. (rahc/PIA-7/Bohol)

Source: Philippines Information Agency (pia.gov.ph)