CORTES, Bohol, Nov. 21 (PIA) –- Nag-una ang ika Tulo’ng Distrito sa Bohol karon sa labing gamay nga kaso sa Corona Virus Disease (COVID-19) sa unom ka kaso samtang labing daghan pa sa tulo ka distrito ang Una nga Distrito sa 18 ka kaso.
May 15 lamang ka kaso sa COVID ang nagpabilin nga natala sa ika Duha nga Distrito sa Bohol, segun sa taho sa Bohol Inter-Agency task Force on the management of Emerging Infectious Diseases (BIATF) nga gipagawas Nobyembre 20.
Hinuon, nahimo nga 13 na lang ang kaso sa COVID nga natumbok sa mga sakop sa kasundalohan nga nagpadayon sa ilang kwarantina didto sa sulod sa Camp Lino I Chatto Training and Doctrine Center sa Macaas, Tubigon, sa unang Distrito sa Bohol.
Sa nahisgutan nga Una’ng Distrito, kasamtangan pa nga gasagubang sa usa ka kaso nga natala sa Catigbian nga dala sa nahi-uli nga locally stranded individual (LSI), usa ka kaso sa local nga pagtakod (community transmission) sa Calape, usa ka kaso dala sa LSI sa Antequera, lain nga usa ka kaso nga nadala sa LSI sa Tagbilaran City ug usa ka kaso pa sa local nga pagtakod sa Dauis.
Sa ika duha nga Distrito, nagpabilin pa sa hugot nga pagbantay nga walay makasulod-gawas sa Purok 5 sa isla nga barangay sa Maomawan, Bien Unido human ipahimutang ang granular lockdown aron sa pagpugong nga dili na makakatag pa ang 10 ka kaso nga natala pinaagi sa local nga pagtakod didto.
Sa silingan nga lungsod sa Talibon, sa susamang distrito, nagpabilin pa gihapon usab nga gikwarantina ang duha ka kaso sa local nga pagpanakod-takod, samtang gilaming pa usab ang us aka ming-uli nga Overseas Filipino Worker (OFW) sa Trinidad kinsa nasayrang nagpositibo sa sakit nga mananakod.
May usa pa usab ka kaso sa Ubay, nga nadala sa usa ka LSI nga ming-uli samtang sa Sagbayan, laing usa pa usab ka kaso ang gitutokan kay nadala sa ming-uli nga LSI.
Sa ika Tulo’ng Distrito sa Bohol, dupot nga gitutokan sa mga health emergency responders ang Candija nga may 5 ka kaso sa COVID: tulo niini nadala sa nanguli nga LSI, usa ka kaso sa sakit nga nadala sa us aka Authorised Person Outside Residence (APOR) ug laing usa ka kaso sa local nga pagpanakod.
Lain nga kaso sa ika tulo nga distrito mao ang usa ka kaso nga nasundan didto sa lungsod sa Carmen; usa ka kaso sa local nga pagpanakod.
Kini samtang natala sa Bohol ang 39 na lamang ka kaso, Nobyembre 20, 2020.
Kini usab samtang natala sa Bohol ang kompirmado nga ika 12 ka Bol-anon nga namatay tungod sa gikahadlokan nga sakit, nga nataho, duha ka adlaw na nga milabay.
Usa ka babaye nga edaran nga nagagikan sa isla sa Buenavista ang katapusang biktima sa COVID, nga nagpatala sa ika duha usab nga kaso sa kamatayon sa nahisgutang lungsod sa ika duha nga distrito.
Gawas sa duha sa Buenavista, may tagsa na ka kinabuhi nga nabuhis sa gikaintapan nga sakit sa lungsod sa Bien Unido, Danao, San Miguel, Talibon, Trinidad ug Ubay, sa kinatibuk-ang ihap nga walo, sa pagsuwat niining balita.
Sa Una nga Distrito, natala usab ang duha ka kaso nga natumod ngadto sa kamatayon didto sa Calape, usa ka kaso sa Corella ug laing usa ka kaso sa Tubigon.
Nahuptan usan sa ika tulo nga distrito ang limpyo nga talaan sa mga nangamatay tungod sa nahisgutan nga sakit. (rahc/PIA7/Bohol)
Source: Philippines Information Agency (pia.gov.ph)
0 Comments