MAMBAJAO, Camiguin, Nob. 4 (PIA) —Sa natalang lokal nga kaso sa COVID-19 sa lugar, gideklara sa Pangagamhanang Lokal sa Mambajao ang mga index house sa Sitio Ire, Barangay Balbagon, ilawom sa localized lockdown ug focus containment aron mapugngan ug maminusan ang pagkuyanap sa virus.
Kini, human nakatala ang local government unit (LGU) ug lima nga kumpirmadong COVID-19 nga kaso gikan sa nasangpit nga sitio.
“All government and private facilities/establishments, except hospitals, pharmacies, and other essential services, shall be closed in the entire duration of the lockdown,” si Mambajao Mayor Yñigo Jesus Romualdo nagpahayag sa iyang Executive Order No. 32 series of 2020.
(Ang tanan nga pampubliko ug pribadong pasilidad/establisamento, gawas sa mga ospital, botika, ug uban pang mahinungdanon nga serbisyo, isira sa tibuok nga panahon sa lockdown)
Ang mga negosyo nga gitugotan sa pagpadagan gikinahanglan nga istrikto nga ipatuman ang mininmum public health standards sama sa pag-implementar ug distansya, pagsul-ob sa face masks, gwantes ug uban pang mga personal protective equipment, ug pagsagop sa skeletal staffing, ug uban pang gabay gikan sa Department of Health (DOH).
Ang pagsunod sa nasangpit nga EO bantayan ug ipatuman sa Mambajao Joint Task Force Coronavirus Shield, nga gilangkuban sa Philippine National Police (PNP), Armed Forces of the Philippines (AFP), Bureau of Fire Protection (BFP), ug Philippine Coast Guard (PCG).
Ang order mahimong epektibo, Oktubre 27 hangtod Nobyembre 10, 2020.
Base sa rekord, Nobyembre 4, ang Mambajao nakatala ug 16 nga kumpirmadong COVID-19 nga mga kaso diin 2 ang mga authorized persons outside of residence (APORs), 5 ang locally stranded individuals, ug 9 ka lokal nga transmission. (VPSB/PIA10)
Source: Philippines Information Agency (pia.gov.ph)
0 Comments