TAGBILARAN CITY, Nov. 10 (PIA) -- Gipangunahan ni Cabinet Secretary Karlo Nograles, kinsa naglingkod isip chairman sa Task Force Zero Hunger ang paglusad sa Pilipinas Kontra Gutom, Martes sa buntag, Nobyembre 10.
Usa kini ka multi-sectoral nga kalihokan nga gilangkoban sa nagkalain-laing organisasyon gikan sa lain-laing sektor apil na sa gobyerno, non-profit organizations ug mga pribadong kumpanya gikan sa nagkalain-laing industriya.
Atol sa gipahigayong virtual launching, ang mga founding members sa Pilipinas Kontra Gutom gikan sa pribadong sektor mi-presentar sa ilang nagpadayong inisyatiba sa pagtubag sa kagutom sa pagsugod sa coronavirus disease 2019 (COVID-19) pandemic.
Ang mga founding members naglakip sa Coca-Cola, DOLE Philippines, Johnson & Johnson, Metrobank, McDonalds ug San Miguel Corporation.
Si Nograles nagkanayon nga adunay panginahanglan sa pagsugod karon sa pagtubag sa kagutom sa Pilipinas tungod kay sa pinakaulahing resulta sa SWS survey, nagpakita nga ang mga pamilyang nakasinati og kagutom nisaka gikan 4.2 milyon ngadto na sa 7.6 milyon ka pamilya.
Inisyal nga target nga benepisyaryo sa task force alang sa Pasko ning tuig ang 100 ka libong pamilya, matud pa ni Nograles.
Apan, gidugang usab sa Kalihim nga mas dakung target ang ipahibalo sa buwan sa Pebrero o Abril 2021 diin ang task force gitakdang maglusad og mas dakung kalihokan diin dugang CSOs, NGOs ug gikan sa pribadong organisasyon ang mosalmot sa maong kalihokan.
Ang task force naglaraw nga makuha nila ang ilang bag-ong target sunod tuig sa tuig 2022.
Namugna ang Task Force Zero Hunger pinaagi sa Executive Order No. 101 nga gilagdaan ni Presidente Rodrigo Duterte aron motabang sa pagpapas sa kagutom sa nasud. May nag-una kining katungdanan sa paghimo og road map pinaagi sa National Food Policy nga gilusad niadtong Oktubre 16. (ecb/PIA7-Bohol)
Source: Philippines Information Agency (pia.gov.ph)
0 Comments