Cebuano News: Serbisyo sa gobyerno, gidala sa AUDIO-Bohol ngadto sa Tribu Eskaya sa Duero

TAYTAY, DUERO, Nov. 5 (PIA) -- Gidala sa Association of United Development Information Officers (AUDIO)-Bohol ang mga serbisyo sa gobyerno ngadto sa Tribu Eskaya sa lungsod sa Duero niadtong Nobyembre 3, 2020.

Ang National Commission on Indigenous Peoples (NCIP), nga nagsaulog sa ilang ika-23 ka tuig sa IPRA niadtong buwan sa Oktubre, maoy host sa gipahigayong ‘Bisita sa Eskaya Tribe Community Immersion’ sa mga miyembro ug opisyal sa AUDIO-Bohol didto sa barangay Taytay, lungsod sa Duero

PANALIPOD SA SAKIT. Gitunol ni Fiel Gabin, Presidente sa AUDIO Bohol ang usa ka kahon nga face mask ug face shields aron magamit sa mga sakop sa Tribu Eskaya agi og panalipod sa sakit nga coronavirus disease. Kauban ni Gabin sila Larry Evangelista (AUDIO Vice President), DILG Provincial DIrector Jerome Gomzales, Eskaya chieftain Hilario Galambao ug Bruce Zabala, opisyal sa AUDIO Bohol. (rahc/PIA-7/Bohol) 

Kini isip paagi sa AUDIO-Bohol sa pagpahibalo ngadto sa komunidad sa Tribu Eskaya sa direksyon sa gobyerno ning panahon nga mas gikinahanglan ang kasayoran tungod sa hagit sa pandemya dala sa coronavirus disease 2019 (COVID-19).

Ang AUDIO-Bohol usa ka hiniusang bahan sa mga information officers sa kalungsoran kun local government units (LGUs) ug mga ahensya sa kagamhanan kun national government agencies (NGAs) nga nagtambayayong sa pagpakatap sa mga kasayoran ngadto sa katawhan sa mga kalungsoran.

Sa pagpanguna sa information officer sa City Government of Tagbilaran nga si  Fiel Angeli Araoarao Gabin isip presidente sa grupo, gitunol ngadto sa Tribu Eskaya ang mga face masks ug face shields nga gidonar sa grupo ngadto sa komunidad.

Ang Provincial Director sa Department of the Interior and Local Government (DILG) nga si Dir. Jerome Gonzales ug ang CMO officer sa 47th Infantry Battalion sa Philippine Army nga si 1Lt. Elma Grace Remonde nihatag og briefing kalabot sa End Local Communist Armed Conflict (ELCAC).

Samtang may gipangapud-apod usab nga mga information, education and communication (IEC) materials gikan sa Agricultural Training Institute (ATI), Social Security System (SSS), Pag-IBIG ug DILG.

Walo ka buwan human i-deklarar ang community quarantine sa tibuok nasud, nagpabiling COVID-free ang komunidad sa Tribu Eskaya sa lalawigan.

Matud pa ni Taytay barangay kapitan Edgardo Bagotsay nga usa usab ka miyembro sa Tribu Eskaya, hapsay ang pagpakatap sa kasayoran kalabot sa health and safety protocol sa ilang tribu tungod na usab sa kooperasyon ug pagtinabangay sa ilang mga kauban ug ang regular nga paghatag og updates gikan sa local government unit.

Samtang ang Eskaya tribal elder nga si Hilario Galambao nagpasalamat sa NCIP tungod kay matud pa wala sila kalimti nga kumustahon ug gihatagan og tabang ning mga milabay nga buwan sukad gipaubos ang Pilipinas sa community quarantine tungod sa COVID-19.

Sa wala pa nagka-pandemya, usa  ka tourism learning site ang komunidad sa Tribu Eskaya sa lungsod sa Duero, apan sukad nikatap ang COVID-19, gihunong una nila ang pagdawat og mga bisita, bisan sa mga Bol-anong turista.

Ang komunidad sa Tribu Eskaya sa Duero nahimutang mga 86 kilometro ug kapin sa duha  ka oras ang byahe gikan sa syudad sa Tagbilaran. (ecb/PIA7-Bohol)

Source: Philippines Information Agency (pia.gov.ph)