MANILA, Nov. 6 (PIA) -- Nagsugod na sa pagpangdawat ang Department of Justice (DOJ) og mga sumbong batok sa mga ahensiya sa gobyerno nga nalambigit sa bisan unsang matang sa korapsyon.
Matud pa sa pahayag sa tigpamaba sa DOJ nga si Emmeline Aglipay Villar, angay lamang nga magpadala og email ang publiko sa dojc@doj.gov.ph alang sa bisan unsang sumbong o report sa korapsyon nga gilambigitan sa bisan asang ahensiya sa gobyerno ug bisan kinsang opisyal sa gobyerno.
Mahimo usab nga motawag sa temporaryong hotline sa DOJ nga 8521-2930.
Kalabot niini, nihangyo usab si DOJ Kalihim Menardo Guevarra sa publiko, ilabi na sa media nga dili tawagong ‘mega task force’ ang katungdanan sa ahensya nga pangunahan ang imbestigasyon sa mga nahitabo nga korapsyon sa gobyerno.
Matud pa ni Guevarra, mas maayong “task force against corruption” na lamang ang itawag tungod kay mas gusto man sa ahensiya nga magtrabaho og hilom apan epektibo. (ecb/PIA7-Bohol)
Source: Philippines Information Agency (pia.gov.ph)
0 Comments