Cebuano News: Sobra katunga sa COVID sa Bohol, sakay sa APOR

TAGBILARAN CITY, Bohol, Nov. 12 (PIA) -- Sobra sa katunga sa mga aktibong kaso sa Corona virus disease (COVID-19) sa Bohol Nobyembre 11, mga dala sa Authorized Persons traveling Outside Residence (APOR) ug dili sila angay kabalak-an kay gipang-lain na aron dili makatakud.

Kini samtang natala sa Bohol ang 100 ka aktibong kaso sa COVID, ug 56 niini kaso sa mga APOR nga nia sa Bohol tungod sa trabaho.

Labing daghan niini mao ang 55  ka mga sundalo nga mingtabok sa Bohol aron mosalmot sa bansay-bansay sa arte sa panggubat nga gitanyag sa Camp Lino I Chatto sa Macaas Tubigon. Hinuon, sa pagka-karon, suspendido una ang pagpang-dawat sa mga sundalo, hangtud masolbad na ang kaso sa nagpositibo didto.

Laing kaso sa APOR ang natala sa Loon, segun sa taho nga gipaambit sa Bohol Inter Agency Task Force on the Management of Emerging Infectious Diseases.

GIKAN SA BOHOL RT PCR MOLECULAR LAB. Sa ika duha nga sunod-sunod nga adlaw, sa Nobyembre 12, wala nay bag-ong kaso nga natala sa Bohol, butang nga angayan gyud nga ikalipay sa tanan samtang ang Bohol nangandam alang sa paglibkas na sa mga lagda nga magpugong sa pagbyahe. (PIA Bohol) 

Ang mga kaso nga dala sa APOR, napun-an pa sa 18 ka kaso nga bitbit sa mga Bol-anon nga Locally Stranded Individuals (LSI) ug ug duha  ka kaso nga dala sa Bol-anong miuli nga Overseas Filipino Worker OFW).  

 Usa  ka LSI gikan sa Sagbayan, usa gikan sa Ubay, 4 gikan sa Pilar, 7 natala sa Candijay, 3 sa Loon, 1 sa Alburquerque ug laing usa sa Dauis.   

 Gani, kon sumadahon ang tanan nga nakadala sa sakit dinhi, 76 ang mga nagpositibo apan kini ilang dala gikan  sa gawas sa Bohol ug karon kasamtangan nga naa sa mga isolation facilities sa mga kalungsuran.

Sa 100 ka kaso, 24 niini ang nakuha gikan ra usab sa local nga pagpangtakud-takod, segun sa BIATF.

Padayon pa nga gipailawom sa granular lockdown ang Purok 5 sa isla nga barangay sa Maomawan sa Bien Unido, ug gani, nagpadala na og mga ginalon nga tubig mainum si Kongresista Erico Aristotle Aumentado, agi og abag sa mga dili una makagawas sa ilang mga panimalay.

Didto may 10 ka tawo nga nagpositibo human 6 niini nakaduol sa usa ka pasyente nga gidala na ngadto sa Don Emilio del Valle Hospital sa Ubay sa mainland Bohol.

Lain nga upat ang natumbok human sa contact tracing sa sunod nga mga henerasyon sa mga natakdan, segun pa ni Dr. Cesar Tomas Lopez.

Gawas sa Bien Unido, may laing duha  ka kaso sa community transmission sa Talibon ug laing duha usab gikan sa Carmen.

 Upat ang nagpositibo sa Sierra Bullones dala sa local nga pagpanakud, samtang may tagsa  ka kaso ang Bilar, Loon, Dauis, Candijay ug usa  ka kaso sa medical health worker nga natakdan sa Tubigon. (rahc/PIA-7/Bohol)

Source: Philippines Information Agency (pia.gov.ph)