SAN JOSE, Antique, Nobyembre 12 (PIA) -- Magapatukod ang Department of Agriculture – Bureau of Animal Industry (DA-BAI) kang feed mill facility nga nagabalor kang P7.5 milyon sa banwa kang Sibalom.
Ginpahayag kang DA nga ang kadya nga proyekto makapabugana kang livestock farming kang mga manugsagod kang sapat nga may problema tuhoy sa pagtaas kang presyo kang commercial feeds nga nagaresulta naman sa andang manubo nga kita.
Nalakip sa kadya nga feed mill project amo ang pagpatukod kang warehouse, pag-install kang pneumatic hammer mill, horizontal feed mixer, micro mixer, storage bin, flat conveyor, bucket elevator, weighing bucket, sack sealer, weighing scale, solar perimeter kag warehouse lights.
Natalana nga magabukas sa Pebrero 2021 ang feed mill facility nga kun sa diin makagaling dya tubtub sa 8 ka toneleda kang mais kada adlaw.
Sa bahin ni Sibalom Municipal Agriculturist Albert Estoy, ana ginpahayag nga ang dya nga proyekto makabulig panubo kang presyo kang animal feeds kapin sa 30 porsyento comparar sa presyo kang mga commercial feeds nga ginabaligya kang pribado nga sektor.
“Ang dya nga feed mill project nangin posible bangud kang Biyaheng Bukid nga ginhiwat kang 2017 sa Hamtic. Tinutuyo kadya nga maresolba ang problema kang mga mangongoma kag manugsagod kang mga kasapatan. Suno man sa inisyal nga pagdiskusyon naton sa Sibalom Livestock and Poultry Raisers Association or SILPRA, nagaplano kami nga magbakal kang preska nga mga mais sa lokal nga mga mangongoma sa balor nga P16.00 – P17.00 per kilo, ” siling ni Estoya.
Ginalauman man ni Estoy ang pagpasangkad kang mga taramnan kang mais sa probinsya kang Antique agud magamit kang husto ang feed mill kag masabat ang mataas nga kinahanglanon kang mga karne kang baboy labi na gid sa National Capital Region. (JSC/LML/PIA6 Antique)
Source: Philippines Information Agency (pia.gov.ph)
0 Comments