TAGBILARAN CITY, Bohol, Nov. 10 (PIA) – "Wala ma kompormiso ang health care system, kompleto ang atong mga gamit, aduna kitay igo nga mga tawo, igo nga tambal ug igo ang atong mga pasilidad, para pagpanalipod sa atong lalawigan sa Bohol."
Kini maoy gipadayag ni Dr. Cesar Tomas Lopez, tigpamaba sa Bohol Inter Agency Task Force on the management of Emerging Infectious Disease, dungan sa nagpadayon nga pagpatag sa kurba sa mga nasakit sa coronavirus disease sa Bohol.
Kini usab dungan sa namatikdan nga pagdaghan sa sakit nga natutokan na sa isla nga Barangay sa Maomawan sa Bien Unido, Bohol, Nobyembre 9.
Sa susamang adlaw, gitaho ni Dr. Lopez nga natumbok na sa mga medical professionals ang tinubdan sa kaso sa COVID sa Maomawan, usa ka pasyente nga taga didto nga nadala sa Don Emilio Del Valle Hospital sa Ubay tungod sa simtomas sa COVID.
Sa una nga contact tracing, matud pa, unom ang nagpositibo sa mga nakaduol sa nahisgutang pasyente samtang sa minsunod nga mga contact tracing sa unom ka mga nagpositibo, laing tulo na usab ang nagpositibo sa sakit sa second generation contacts.
Sa kinatibuk-an, 10 ang kaso sa Bien Unido, tanan dala sa pagpanakod nga gikan sa mga silinganan lamang usab, sanglit kining tanan nga kaso mga tawo nga wala mingbyahe ug nakaabut sa ubang mga layong lugar.
Tungod niini, gipailawom na ang granular lockdown ang Purok 5 sa barangay Maomawan, aron dili na masabwag pa o makaapekto sa ubang tawo didto, taho ni Dr Lopez.
Sa nahigutan usab nga adlaw, 30 ang namatikdang nag positibo nga dala sa community transmission samtang 80 usab ang nagpositibo apan kini dala sa mga Authorized Persons travelling Outside Residence (APOR), locally stranded individuals (LSI) ug mga nanguli nga mga Overseas Filipino Workers (OFWs).
Sa laing bahin, sa gikahadlokan nga nag positibo nga mga APOR sa Tubigon, gipasalig sa BIATF nga nagpabilin nga naa sa 14 ka adlaw nga isolation ug kwarantina, bisan pa nga may napulo n aka sundawo ang nauli-an sukad namatikdan ang outbreak didto sa kampo sa Lino I Chatto, sa Macaas.
Subay usab niini, temporary pa nga gipaundang sa mga tinugyanang militar sa Tubigon ang pagpangdawat sa mga APOR alang sa bansaybansay sa mga sundawo sa arte sa pagpanggubat.
Kini hangtud nga ma stabilize na ang sitwasyon sa kampo, matud pa sa doctor nga nahimong politico.
Sa Nobyembre 10, miabut na sa 110 ka positibong kaso sa Bohol; 30 niini pinaagi sa local transmission samtang 80 niini mga LSI, APOR ug nanguli nga OFW, nga karon usan naa na sa mga isolation facilities.
Apan bisan pa niini, aghat dalang pahimangno sa tigpamada sa BIATF, dili gyud mahitabo nga magkompyansa kita, ang pag-bale-wala sa pagsuot sa face mask ug ang pagpadistansya sa usa o duha ka metros nga physical distancing aron dili kahatagan og kahigayunan ang sakit nga makapanakod. (rahc/PIA-7/Bohol)
Source: Philippines Information Agency (pia.gov.ph)
0 Comments