SYUDAD SANG ROXAS, Capiz, Nobyembre 11 (PIA) – Trese ka magamay nga mga negosyante sa probinsya sang Capiz ang kalakip sa 41 ka mga nagtapos sa una nga Kapatid Mentor ME – Money Market Encounter (KMME – MME) nga online nga programa sang Department of Trade and Industry – 6 kag Philippine Center for Entrepreneurship – Go Negosyo.
Ang nasambit nga programa ang nagatuyo nga magbulig sa mga magamay nga negosyante nga mapasangkad ang ila tagsa ka mga Negosyo agud nga makabulig sa pagsanyog sang ekonomiya subong man makabulig resolba sa problema sa kakulang sang trabaho bangud sang pandemya.
Ang mga pumalasakop sa KMME nga ginatawag mga “mentees” ang nakakompleto sang 10 ka module sessions kag nakapasa sa Business Improvement Plan (BIP) presentation nga isa sa mga kinahanglanon agud maka tapos sa programa.
Nahibaluan nga ang "virtual graduation" ukon online nga pagpatigayon sang seremonya sang gradwasyon ang ginpatigayon sang Septyembre.
Samtang nangin problema sa proseso sang programa ang koneksyon sang internet kag brown out apang natigayon man nga malampuwasan sang mga mentees sa bulig sang mga dedikado nga PCE mentors kag DTI facilitators.
Ang one-on-one coaching nga nag-sentro sa “financial plan preparation” ang nakabulig sang lubos agud nga labi pa gid nga matutokan sang mga mentees ang ila pagdihon sang tagsa ka Business Improvement Plan.
Ang mga nag tapos sa online edition sang KMME ang handa na nga mapasangkad ang ila mga Negosyo bangud ang programa ang nakatigayon na nga makapasangkad sang ila ihibalo kag imahinasyon sa pagnegosyo magluwas pa nga nabuligan man sila kon paano magamit ang ila tini-on nga may naka-focus nga atensyon kag isratehiya. (JBG/AAL/PIA Capiz)
--
J
Source: Philippines Information Agency (pia.gov.ph)
0 Comments