SYUDAD SANG ILOILO, Nobyembre 11 (PIA) -- Kapin sa 16 ka mga naglapas sang patakaran sa pagsuksok sang face mask sa Syudad sang Iloilo ang nag-upod sa Iloilo City Government Beautification Program.
Ang nasambit nga mga indibidwal naglapas sa regulasyon sang syudad ilabi na sa health protocols nga pagsuksok sang face mask sa pampubliko nga lugar.
Ginpatinlo kag ginpatanom ang mga nagbayolar sa mga nagkalainlain nga bahin sang syudad, suno sa post sang Iloilo City Government sa ila official Facebook page.
Nalakip sa Regulation Ordinance (RO) No. 2020-085 ang community service sang kabug-usan nga walo ka oras sa tatlo ka adlaw sa mga wala gasuksok face mask sa pampubliko nga lugar.
Ang pagsuksok sang face mask ang isa sa mga pamaagi sang city government nga mapahinay ang paglapta sang coronavirus disease 2019 ukon COVID-19.
Samtang, gintagaan naman sang certificate of completion ang mga nagserbisyo. (Iloilo City Government/JSC/CBA/PIA6)
Source: Philippines Information Agency (pia.gov.ph)
0 Comments