Aklanon News: Balay Silangan it New Washington ginlunsar

KALIBO, Aklan, Disyembre 30 (PIA) --  Gin-inagurahan kurundaya eamang it banwang New Washington ro ana kara nga Balay Silangan Reformation Center.

Gindungan sa pag inagurar it Balay Silangan ro pagbukas man it Mental Health and Wellness Facility it nasambit nga banwa.

Suno  kay Mayor Shimonette Francisco it banwang New Washington, ro paglunsar it Balay Silangan ag ro pagbukas it Mental Health and Wellness Facility hay dugang nga butang para sa pagtao it serbisyo sa ikamayad it eawas it publiko.

Gindugang pa gid ni Mayor Francisco nga ro Mental Health and Wellness Facility sa banwa hay pinakauna sa bilog nga Pilipinas nga ginadumaeahan it gobyerno local.

Samtang, ro Balay Silangan Reformation Center sa New Washington ro panglima nga reformation center nga ginlunsar sa Aklan, pagkatapos nga una nga ginbuksan ro sa mga banwa it Lezo, Madalag, Malay ag Libacao, sa pagpanguna it Philippine Drug Enforcement Agency (PDEA), Department of the Interior and Local Government (DILG), ag mga mayor ag opisyales it mga nasambit nga mga banwa.

Raya hay sangka programa it gobyerno nga nakatukod it temporary nga ilistaran it mga “drug offenders” sa tuyo nga sanda ra hay reformahon ag mangin independente ag masinueundon sa laye nga mga pumueuyo.

Suno sa DILG-Aklan, ro programa hay sangka alternatibo man nga pagbulig sa mga personalidad may kaangtanan sa droga pero owa nagagamit ag bukon it kwalipikado nga magpaidaeum sa pagbueong ag pagrehabilitar sa mga pasilidad nga gina dumaeahan it Department of Health (DOH).

Ginatao sa idaeum it programa ngara ro mga pagbulig pareho ku padayon nga edukasyon pagdepara sa ikamayad it eawas, ag ispiritwal ag pisikal nga aktibidades.

Mageuwas sa PDEA ag DILG, ro iba pang mga ahensya it gobyerno nga katuwang sa pag implementar it Balay Silangan hay ro Department of Social Welfare and Deveopment (DSWD), Technical Education and Skills Development Authority (TESDA), Parole and Probation Administration (PPA), Bureau of Corrections (BUCOR), Department of Trade and Industry (DTI), Department of National Defense (DND), Philippine National Police (PNP), ag Armed Forces of the Philippines (AFP), nga tanan hay miyembro it Regional Oversight Committee. (JSC/VGV/PIA6 Aklan)

 

Source: Philippines Information Agency (pia.gov.ph)