KALIBO, Aklan, Disyembre 30 (PIA) - Uman nga nagapadumdum ro Provincial Health Office iya sa publiko nga maghaeong sa pagbakae ag paggamit it paeupok sa pagselebrar it Bag-ong Dag-on.
Sa isaea ka interbyu, ginhambae ni Ruene Perucho, Violence ag Injury Prevention Program and Health Emergency Management Coordinator it PHO-Aklan, nga ro paggamit it paeupok hay isaea eon gid man nga tradisyon it Pilipino sa pagselebrar it Bag-ong Dag-on sa pagpati nga mapaeayo ro mga kamalasan nga gindaea it ngkataliwan nga dag-on.
Pero, gintaw-an it diin ni Perucho nga ro kahilwayan ag kaeuwasan it tanan ro dapat nga mangin prayoridad it kada isaea.
Angot kara, ginaduso sa publiko nga mag-usoy it alternatibo nga pamaagi para sa paselebrar it Bag-ong Dag-on sa pinakaeu-was nga klase.
Nagtao ro Department of Health it pito ka mga alernatibo nga pamaagi kaysa magpaeupok; hara ro mga masunod: paghampas sa tamboe, pagbusina, pagpahayag it glow sticks, pagpukpok sa kaldero, pag-alog it alkansya, pagkumpas sa tamborin, ag pagpatukar it musika or instrument.
Nauna kara, ro DOH hay uwa ginaengganyo ro paggamit it "torotot" ag pito dahil hara hay pwede mkahawa ag makapalapta sa coronavirus disease 2019 (COVID-19).
Samtang, kung ro pagpaeupok hay indi gid malikawan sa selebrasyon, siguraduhon eang gid nga bukon it ilegal nga produkto ro bak-eon.
Suno sa Philippine National Police ro mga masunod hay ginabawae sa merkado: Piccolo, Super Lolo, Atomic Triangle, Large Judas Belt, Large Bawang, Pillbox, Bosa, Goodbye Philippines, Bin Laden, Mother Rocket, Lolo Thunder, Coke In Can, Atomic Bomb, Pla-Pla, Giant Whistle Bomb, Kabasi ag Watusi.
Base sa Republic Act 7183, sin-o man nga madakpan nga may daea ag gabaligya it mga nahambae nga produkto kay pwede mapenahan it pagkakulong halin an-om buean asta sang dag-on ag multa nga P20,000 asta P30,000, pagkansela it permit, ag pagkumpiska it mga illegal nga paeupok. (JSC/SQP/PIA6 Aklan)
Source: Philippines Information Agency (pia.gov.ph)
0 Comments