SAN JOSE, Antique, Disyembre 30 (PIA) -- Nagmando si Presidente Rodrigo Duterte nga pagakanselahon ang face-to-face nga klase sa pinili nga mga lugar kang pungsod bangud sa pagtuhaw kang makalalaton nga sahi kang coronavirus disease sa United Kingdom.
Ginpahayag ni Presidente Duterte nga kinahanglan nga maman-an ang kinaugali kang virus kag indi tana magrisgo nga sugtan ang mga kabataan sa face-to-face nga klase tubtub sa matapos dya.
Sa madumduman, gin-aprobahan kang nagligad ni Presidente Duterte ang trial run kang face to face nga klase sa masunod nga tuig sa mga lugar nga ginakabig bilang low-risk sa COVID-19.
Suno naman sa Department of Education (DepEd), may plano nga gindihon angot sa dry run kang face-to-face nga klase sa Enero sa mga pinili nga mga eskwelahan sa mga lugar nga may minimal risk kang COVID-19.
Sa pihak nga bahin, gin-anunsyar man kang mga otoridad kang UK ang hugot nga pagpatuman kang mga restrictions sa andang pungsod matapos nga ginapatihan nga mas makalalaton kang sitenta porsyento ang bag-o nga sahi kang COVID-19.
Samtang, nagpatigayon dun kang travel ban ang Pilipinas batok sa UK agud malikawan ang pagrapta kang bag-o nga sahi kang COVID-19. Dugang pa, ginaplanohan man kang mga opisyal kang gobyerno ang pagpalawig kang restriction tubtub Enero sa masunod nga tuig.
(JSC/LML/PIA6 Antique)
Source: Philippines Information Agency (pia.gov.ph)
0 Comments