KALIBO, Aklan, Disyembre 30 (PIA) -- Ro Best Practice it gobyerno lokal it Kalibo sa idaeum it Community-Based Drug Rehabilitation and Reintegration Program (CBDRP) hay gin rekognisar it Department of Interior and Local Government (DILG) kaibahan ro 8 pa nga ibang mga banwa ag siyudad halin sa sari-saring parte it Pilipinas.
Ro pagkilaea, suno sa gobyerno lokal it Kalibo, hay resulta it sigidas nga pagtinguha it banwa kaibahan ro mga departamento ag ahensya pareho ku Municipal Health Office (MHO), Municipal Social Welfare and Development Office (MSWDO), Kalibo PNP, ag DILG-Kalibo sa pag sustinir sa tuyo it programa nga may mabahoe nga epekto sa kabuhi it mga Persons Who Used Drugs (PWUDs) sa Kalibo nga mataw-an it tsansa nga magbalik sa andang dati nga kabuhi.
Samtang, sa pagrekognisar sa 9 ngara nga mga LGUs, ginhambae sa sangka pagpahayag ni DILG Secretary Eduardo Ano nga rayang mga banwa ag siyudad hay ebidensya nga epektibo ro mga ginaobra nga pag rehabilitar sa mga komunidad tungod daya ro nagatao it tsansa sa mga nagagamit it droga nga magbag-o para sa andang ikamayad.
Ginhambae man ni Sec. Ano nga sa pihak it COVID-19 nga pandemya,ro gobyerno hay una gihapon sa pagrehabilitar it mga tawo nga nag gamit it droga sa komunidad bilang kaparte ku programa kara kontra sa illegal nga droga.
Ro mga gobyerno lokal nga may mayad-ayad nga community rehabilitation practices, suno kana, hay ro banwa it Magallanes sa Cavite, Banwa it Bacnotan sa La Union, Siyudad it Lucena sa Quezon, banwa it Kalibo sa Aklan, Siyudad it Ormoc, Leyte, Pasig City, Davao Oriental, banwa it Claver sa Surigao del Norte, ag Siyudad it Malaybalay sa Bukidnon.
Ginhambae ni Sec. Ano nga 36 ro nag-abot nga entries sa DILG halin sa sari-saring parte it Pilipinas ag ro DILG, paagi sa Philippine Anti-Illegal Drugs Strategy Project Management Office hay nagpili it 9 nga nagapakita it mayad nga pag implementar it CBDRP.
Ro mga ginpadaea nga entries it mga banwa hay gintan-aw kon may naga eksister nga CBDRP, may 80% sa mga nag enroll hay naka graduate sa programa, ag kon ro LGU hay nagbutang it euwas nga tikang kontra sa COVID-19 nga pandemya. (JSC/VGV/PIA6 Aklan)
Source: Philippines Information Agency (pia.gov.ph)
0 Comments