NEGROS OCCIDENTAL, Disyembre 30 (PIA) — Naghiwat sining karon lang ang mga katapu sang 79th Infantry (Masaligan) Battalion, Philippine Army, sang isa ka Peace Advocacy Symposium para sa mga nakaagum sang serbisyo sa idalum sang Enhanced Comprehensive Local Integration Program (E-CLIP) nga ginhiwat sa Barangay Bato, Syudad sang Sagay, Negros Occidental.
May 39 tanan ka mga indibidwal ang nagpasakop sa programa nga may tuyo proteheran ang mga anay rebelde batuk sa impluwensya sang Communist NPA Terrorists (CNT). Luyag sang gobyerno nga mangabuhi sila nga responsable, mapisan kag maalam nga mga miembro sang komunidad kag mangin kabahin sa pagtapos sang armadong hublag, suno kay 1Lt. Norman Sorilla, 79th IB Civil-Military Operations Officer.
Sa amo nga programam, nagpaathag sang ila mga programa ang mga representante sang National Intelligence Coordinating Agency (NICA), Technical Education and Skills Development Authority (TESDA), PhilHealth, Provincial Social Welfare and Development Office (PSWDO) kag sang Philippine National Police (PNP).
Si Alyas Joross, isa sa mga anay rebelde nag nagpahayag sang iya pagpasalamat sa gobyerno kag sa 79th IB sa pagpatigayon sang amo nga hilikuton.
“Wala ako may ginahinulsulan sa akon pagbalik sa gobyerno kay yara na ako sa matawhay kag tadlong nga pangabuhi. Ini wala ko naangkon sang yara pa ako sa hublag,” pahayag niya.
Sa iya nga bahin, naghingyo si Lieutenant Colonel Gerard Alvaran, Commanding Officer sang 79IB, sa mga anay rebelde nga mangin bahin sang pagbag-o kag makigbahin sa pagsulong sang katawhayan.
“Ginahingyo ko kamo nga indi na magbalik sa kinaandan nga kalakasan. Mangin mapuslanon kag mangabuhi nga matawhay upod ang inyo pamilya. Mangin ehemplo sa iban ninyo nga mga kaupod kag magbulig hingyo sa ila nga maglakat sa banas sang katawhayan,” pahayag ni Lt. Col. Alvaran. (JSC/Lljr/PIA6 Negros Occidental)
Source: Philippines Information Agency (pia.gov.ph)
0 Comments