Animal clinic ug surgery room sa PVET MisOr, pinaka-una sa Mindanao

MISAMIS ORIENTAL, Dec. 22 - Gipasigarbo ni Provincial Veterinary Office Head Dr. Benjamin Resma ang Animal Clinic ug Surgery Room sa Misamis Oriental maoy pinaka-una sa nga pampublikong pasilidad sa Mindanao.

Ang bag-ong pasilidad nga giblessingan niadtong Disyembre 18 ning tuig nahimutang sulod sa buhatan sa Provincial Veterinary Office.
Gitakda na usab nga makumpleto ang kagamitan niini nga gipaabot na lamang.

Matud ni Dr. Resma nga ang animal clinic ug surgery room dako og tabang sa mga pet owners sa lalawigan gumikan kay adunay upat ka surgeon nga pwedeng motabang kanila sa pag- diagnose, pagtambal ug pag opera sa ilang mga binuhing mananap hilabina nga daghang klase sa surgery ang pwede na nga mabuhat sulod sa klinika sama sa spay ug neuter, caesarian birth operation ug uban pa.

Dugang serbisyo nga itunol sa animal clinic mao ang libre nga paghatag sa mga tambal sama sa antibiotics, pain relievers ug dextrose para sa mga mananap nga ipailawom sa operasyon.

Dugang ni Dr. Resma nga gawas sa maong klinika, ang PVET padayun gihapon sa pagpahigayon og mga libre nga operasyon sa matag munisipyo isip parte sa ilang kampanya sa pagpromotar sa spay and neuter, anti-rabbies ug responsible pet ownership.

Sa iyang bahin gipasigarbo ni Dr. James Bautista usa sa mga animal surgeons ug beterinaryo sa PVET nga niining katukoran sa klinika makalikay sa dakong galastuhon ang mga pet owners sa lalawigan tungod kay sila dili na pabayron sa professional fee sa mga doktor.

Ang ila na lamang bayaran mao ang tambal ug mga kagamitan alang sa operasyon.

Dugang niini nga siya nadasig sa gipakita nga inisyatiba ni Governor Bambi Emano ug Dr. Resma nga magtukod ug animal clinic arun matabangan ang mga pet-owners.

Plano karon ni Gov. Bambi nga madugangan pa og laboratory ang maong klinika arun makumpleto na ang serbisyo alang sa mga pet-owners sa lalawigan ug alang usab sa ilang mga binuhi nga mananap kay tinguha niini nga sa umaabot mahimong pet-owner friendly ug animal friendly ang Misamis Oriental. (MisOr PIO)

Source: Philippines Information Agency (pia.gov.ph)