DAKBAYAN SA BUTUAN, Disyembre 22 -- Sa tuyo nga mapalambo ang industriya sa gulay sa Agusan del Norte, usa ka hiniusang team sa mga personahe sa AGUSAN UP! Coordinating Unit ug sa munisipyo sa Kitcharao, ingon man sa mga mag-uuma sa maong lungsod ang gipadala ni Gobernador Dale B. Corvera sa usa ka study mission sa nagpadayon karon nga unang Vegetable Derby ug Harvest Festival sa Talakag, Bukidnon.
Sa pagtambayayong sa probinsya, sa munisipyo ug mga mag-uuma sa Kitcharao gipahiluna karon ang Food Basket Project o ang pagtanum og gulay ug pagproseso sa kabahin niini sa maong lungsod ug tan-aw ni Gob. Corvera nga daghan ang maka-onan ang grupo gikan sa maong kalihukan sa Bukidnon.
Ang maong proyekto kabahin sa Plant and Process Program sa AGUSAN UP!, ang kampanya sa pagpalambo ubos sa administrasyon ni Gob. Corvera inabagan sa buhatan ni Congw. Angel M. Amante-Matba.
Molungtad og tulo ka adlaw ang maong pinaka unang Vegetable Derby ug Harvest Festival sa Bukidnon nga gipasiugdahan sa Mindanao Development Authority (MinDA) sa pagpanguna ni MinDA Sec. Manny Piñol ug sa probinsyal nga panggamhanan sa Bukidnon.
Sulod sa tulo ka adlaw, sayron sa grupo ang mga modernong teknolohiya ug klase sa binhi nga haom itanom sa nagkadaiyang matang sa yuta, partikular sa mga mag-uuma sa upat ka lungsod sa Bukidnon nga mao ang Impasugong, Talakag, Sumilao ug Lantapan. Mahimo usab nilang itudlo ang ilang makat-onan sa mga mag-uuma sa Agusan del Norte aron mapalambu ang produksyon sa ilang umahan.
Sa impormasyon ni Jusyl Rose Amoncio, Agriculturist sa Agusan UP, ang nasangpit nga aktibidad nakatutok sa pagpaila sa tulo ka dagkong variety sa gulay nga mao ang carrots, chinese pechay ug cabbage, pinaagi sa unom ka mga seed company nga gidapit aron maoy motunol sa ilang kahibalo sa mga mag-uuma sa tibuok Mindanao.
Sa unang adlaw, gipasundayag sa mga mag-uuma gikan sa nagkalain-laing bahin sa Mindanao ang ilang mga abot sa umahan ug ang mga produkto nga naproseso gikan sa maong abot.
Sa ikaduhang adlaw, mao ang Agri-Trade Fair ug ang pag-showcase sa nagkalain-laing seed companies sa ilang ani sama sa carrots, cabbage ug chinese pechay, ingon man ang business matching ug pagtuon paggama og kimchi.
Sa ikatulong adlaw mao ang pagbansay sa paggama og carrot cake dungan sa closing program diin dinhe hatagan og pasidungog ang mga mag-uuma sa Mindanao nga dunay pinakamaayong paagi sa pag-uma gamit ang organic farming.
Ang mga makat-onan sa grupo makatabang usab sa bag-ohay pa lang gipahigayon nga groundbreaking sa Zapanta Valley Agri-Tourism Village Enterprise aron maugmad ang dakong potensyal nga umahan sa lungsod pinaagi sa pagtanum og nagkadaiyang klase sa prutas ug gulay nga mosuporta sa itukod usab nga Gulayan Bagsakan sa lugar. (Angel Lyn F. Gaviola, Agusan Up, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments