TAGBILARAN CITY, Dec. 21 (PIA) -- Gitambagan sa Commission on Elections (Comelec) ang mga gustong magparehistro nga may lima ka adlaw na lamang sila sa dili pa matapos ang tuig 2020 aron makaparehistro alang sa piniliay sa tuig 2022.
Sa gipagawas nga public advisory sa Comelec, mahimong magparehistro ang publiko karong Disyembre 21, 22, 23, 28 ug 29.
Matud pa sa tigpamaba sa Comelec nga si Atty. James Jimenez, ang mga magparehistro kinahanglang moadto lamang sa mga Comelec field offices nila ug dalhon lamang ang mga gikinahanglang requirements.
Gikinahanglan usab nga sundon ang mga gipatumang mga health protocols aron makalikay sa COVID-19.
Matud pa sa Comelec advisory, walay voter registration sa Disyembre 24, 25, 26, 27, 30 ug 31.
Kini tungod kay parehong special non-working days ang Disyembre 24 ug 31, samtang regular holidays usab pareho ang Disyembre 25 ug 30.
Sarado ang mga buhatan sa Comelec sa tibuok nasod sa maong mga petsa tungod kay walay trabaho.
Gitakda sa Enero 4, 2021 na mobalik ang operasyon sa mga buhatan sa Comelec diin bukas sila gikan sa adlaw nga Lunes hangtod Huwebes gikan alas 8:00 sa buntag taman alas 3:00 sa hapon. Gitakda ang adlaw nga Biyernes alang sa disinfection sa mga buhatan sa Comelec. (ecb/PIA7-Bohol)
Source: Philippines Information Agency (pia.gov.ph)
0 Comments