Cebuano News: P10K service incentives sa mga kawani sa gobyerno, aprubado na ni PRRD

TAGBILARAN CITY, Dec. 21 (PIA) -- Maayong balita alang sa mga kawani sa gobyerno.

Gipahibalo ni Presidential Spokesman Harry Roque nga gi-aprubahan na ni Presidente Rodrigo Duterte ang Administrative Order 37 nga maghatag og insentibo nga tag-P10,000 sa matag kawani sa gobyerno isip service recognition incentive (SRI).

Base sa maong AO, apil sa mahatagan og insentibo ang mga kawani sa national government agencies, kauban na ang mga naa sa state universities and colleges ug government-owned or -controlled corporations (GOCCs).

Apil usab nga makadawat sa maong insentibo ang mga kawani nga regular, contractual, o casual positions.

Nakalatid usab sa maong AO nga makadawat og P10,000 service incentives ang mga kawani sa Armed Forces of the Philippines, Philippine National Police, Bureau of Fire Protection, Bureau of Jail Management and Penology, Bureau of Corrections, Philippine Coast Guard, ug National Mapping and Resource Information Authority.

Kinahanglan lamang nga nakaserbisyo na sa gobyerno og dili moubos sa upat ka buwan hangtud niadtong Nobyembre 30.

Samtang alang sa mga nakaserbisyo og upat ka buwan paubos, makadawat sila og service incentives base sa pro-rated share.

Gilagdaan ni Presidente Duterte ang administrative order niadtong Disyembre 18, 2020. (ecb/PIA7-Bohol)

Source: Philippines Information Agency (pia.gov.ph)