TAGBILARAN CITY, Dec. 4 (PIA) -- Tungod sa nagsingabot nga Pasko, gimanduan sa Malakanyang ang nagkalain-laing buhatan sa gobyerno ilabi na ang mga miyembro sa Philippine National Police (PNP) ug Armed Forces of the Philippines (AFP) nga hugot nga ipatuman ang minimum health standards aron malikayan ang pagsaka sa kaso sa COVID-19.
Matud pa sa Malakanyang, tanang lugar ilabi na ang mga gikonsiderar nga high risk areas sama sa wet markets, supermarkets, government offices, workplaces, malls ug tiangge angay hugot nga mapatuman ang minimum public health standards.
Ipatuman usab ang localized community quarantine sa pipila ka deklaradong critical areas diin angay nga kanunay andam ang mga quarantine facilities.
Ug tungod kay nagkaduol na ang Pasko diin daghang mamauli'ng Overseas Filipino Workers (OFWs), kinahanglang ipaubos sila sa RT-PCR test ug quarantine period sa dili pa makapauli sa ilang mga pamilya.
Sa lalawigan sa Bohol, nagpagawas si Gob. Arthur Yap og memorandum alang sa temporaryong pagsuspendir sa mga programa, proyekto ug kalihukan sa kagamhanan nga kinahanglang tapokan o pundokan sa mga tawo.
Sa giluwatan ni Yap nga Memorandum 336-2020 niadtong Disyembre 1, isuspendir o pugngan una ang mga programa ug kalihukan sa mga ahensiya, buhatan ug unit sa kagamhanan nga makatapok sa mga tawo samtang nagsulbong ang mga kaso sa COVID-19 sa lalawigan sa Bohol.
Hinuon giklaro sa gobernador nga dili apil sa direktiba ang mga kalihukan sa pagserbisyo sa mga frontline medical, emergency ug security workers.
Gimandoan lakip ang mga lokal nga hepe ehekutibo sa pagsiguro nga ang direktiba ikapadangat ngadto sa kabaranggayan.
Duna lamang 28 ka mga aktibong kaso sa COVID-19 sa Bohol niadtong Nobiyembre 28 apan paspas nga nidaghan ngadto sa 154 sa Disyembre 1 o sud lang sa pito ka adlaw. (ecb/PIA7-Bohol)
Source: Philippines Information Agency (pia.gov.ph)
0 Comments