TAGBILARAN CITY, Bohol, Dec. 12 (PIA) -- Adunay tulo ka matang sa testing sa coronavirus disease (COVID) nga gisunod sa mga tawo nga buot masayud kon sila may kagaw ba sa sulod sa ilang lawas. Karon, hain man niining tulo ang labing kasaligan?
Ang tubag? Depende.
Taliwala sa kalibog sa tanan nganong duna pa gihapon mga testing kits ug dili kadtong labing kasaligan nga Reverse Transcription Polymerase Chain Reaction (RT-PCR) na lamang, gipasabut sa mga batid sa World Health Organization (WHO) nga ang tubag sa pangutana nagdepende sa unsay buot sa usa ka tawo nga masayran.
Tambag sa WHO, sa dili pa mopila aron magpatesting, seguroha kon unsay imong gikinahanglang masayran.
Pananglitan, kon buot mo nga masayran kon aduna ka bay kagaw sa COVID karon mismo, ang maayo nga testing mao kadtong RT PCR.
Mahimo usab nga mogamit sa Antigen Test o mas giila nga Rapid Antibody Diagnostic Test (RADT), apan ang resulta niini nga test, dili ingon ka kasaligan kon itandi sa RT PCR, matud pa sa WHO.
Parehas ang himoon sa RT-PCR ug Antigen Test: magkuha og swab samples gikan sa ilawom sa ilong o sa bubunlan.
Apan ang Antigen (RADT) dili na magkinahanglan pa og moderno nga laboratoryo ug mga kahimanan, mao nga mas dali kini makuha ang resulta ug mas barato kini kon itandi sa RT PCR.
Matud pa, may mga antigen tests nga ikapagawas human sa 15 minutos lamang.
Ang RT-PCR ug Antigen tests parehas nga girekomendar sa WHO nga magamit sa pagtesting sa COVID, apan ang RADT o Antigen Test girekomendar lamang sa mga lugar nga wala pay RT PCR nga natukod ug dili possible nga makakuha og RT PCR results.
Sa laing bahin, ang RT PCR ang kasamtangan nga testing nga labing kasaligan pa sa pagka karon, segun sa WHO.
Kini tungod kay ang pagtesting nagkinahanglan pa og moderno nga laboratoryo, ug mga hanas ug gibansay nga mga tigdumala sa pagtesting.
Tungod niini, mas mahal ang RT PCR kay sa antigen tests ug mas langay og dyutay ang resulta ug kasagaran niini, makagawas ang resulta human sa 24 oras o usa ka adlaw.
Ang RT PCR usab mao gayud ang girekomendar nga testing sa WHO konang ipatesting, aron mahibaw-an kon ang usa ka tawo, may COVID ba, sa panahon nga siya gitesting.
Apan kon buot masayud kon, sa nanglabay na nga mga adlaw, may higayon ba nga nakakuha ka sa COVID, ang maayo mao ang Antibody Test o usahay giila isip Serology Test.
Ang antibody test, segun pa sa WHO, matug-an kon sa nanglabay nga panahon, nagkaCOVID ba pinaagi sa pagtan-aw sa reaksyon sa antibody sa lawas sa pagpakigbugno sa kagaw sa COVID bisan kon wala’y dautan nga gibati ang tawo. Dili kini makatug-an kon sa pagka karon, may igo na ba nga panagang sa COVID sulod sa lawas.
Ang pamaagi sa pagkuha usab sa sample niini mao ang pagkuha sa dugo, nga mahimong pinaagi sa hypodermic needle injection o pagkudlit sa tudlo.
Apan, dason sa WHO, dili mahimo ang antibody test nga mao’y saligan tungod kay mahimo nga negative ang resulta niini kay dili kini makakita kon may kagaw na sa sulod sa imong lawas karon kon ang imong antibody wala pa makabantay niini. (rahc/PIA7/Bohol)
Source: Philippines Information Agency (pia.gov.ph)
0 Comments