Cebuano News: Year-end sale nga gidugok sa mga tawo, gipaundang

TAGBILARAN CITY, Bohol, Dec. 22 (PIA) -- Gipaundang na sa Alturas Group of Companies (AGC) ang gikabaniog ug gisaway nga year-end sale sa kompanya dala sa dili madumala nga pagpunsisok sa mga katawhan nga buot mamalit sa baratong baligya.

Kini bisan pa sa personal na nga pagmonitor ug pagdumala sa mga sakop sa Bohol Inter Agency Task Force on the Management of Emerging Infectious Diseases kinsa mitabang na sa kompanya sa pagpasunod sa luwas nga patakaran sa paglikay sa sakit nga mananakod.

PAHIBAW SA KASELASYON. Kini maoy gipatik sa AGC sa ilang Facebook Page human nakadawat sa hait nga mga pagsaway tungod sa wala mamaayo pagkadumala nga sales promotions sa miagning mga adlaw. (PIA Bohol)

Matud ni Ariel Fullido, kinsa anaa sa marketing and promotions sa AGC, naglisud gyud sila sa pagbadlong sa mga tawo, kinsa dili na makahuwat sa pilahan aron makasulod.

Ang annual year end sale sa AGC kanunay nga gidugok sa mga tawo kay bukas kini taman sa mga alas 10:00 sa gabii kasagaran, apan karon, dala sa curfew, sayo manira ang mall, mao nga dungan nga ning-asdang ang mga tawo nga naglikay sa curfew. 

Ang AGC gikataho nga nagtanyag na usab sa susamang sales promotion sa ilang laing supermarket sugod Disyembre 21, apan dala sa kasinati-an, wala na kini ipadayon pa.

"We deemed it necessary to take this proactive measure given the anticipated surge of mall-goers this holiday season (Amo nga nahukman nga kinahanglan kining atong buhaton aron magpanalipod ilabi na kay gilauman nato nga modagsang gyud ang moadto sa mga malls niining  panahon sa holidays)."

"In line with this, we sincerely apologize to our dear shoppers for the abrupt cancellation. Please know that this is only for your safety and welfare (Nunot niini, among pangayoon ang inyong pagsabut sa dinali-an nga pagkansela. Hibaw i nga kini alang lamang usab sa inyong kaayohan)," saysay sa pahayag sa mall.  

Magbukas pa gihapon ang malls ug shopping centers apan wala nay sale ug ibalik na sa normal nga presyo niini ang mga baligya, pasabut ni Fullido.

Gisumsuman sa social media ang sale nga gihimo sa Island City Mall sa AGC tungod sa mga hulagway nga giambitan nga nagpakita nga wala nay social distancing nga napatuman didto dala sa kadaghan sa mga tawo.

Niini gidasonan usab sa BIATF ang pagsaway sa publiko sa gisalikway na nga protocols sa paglikay sa makatakod nga sakit nga nanghasi pa karon ug gikataho nga may lahi na usab nga kamangtas.

Wala pa hinuon masayri kon pasakaan ba og kaso ang mall sa ilang gibuhat, ug kon kini multahan ba. 

Kini usab bisan pa nga gitaho sa BIATF pinaagi sa tigpamaba niini nga si Dr. Cesar Tomas Lopez Disyembre 21 nga 25 na lang ang kaso sa COVID-19 sa Bohol.

Sa 25 ka kaso, tulo na usab niini ang dala sa local transmission samtang 22 niini ang nadala sa mga nanguli nga locally stranded individuals ug Overseas Filipino Workers o overseas Filipinos ug natakin sa mga Authorized Persons Outside Residence.

Tag  saka kaso sa local transmission sa COVID-19 ang natala sa Carmen, Sikatuna ug Talibon, segun pa sa BIATF.

Gitaho nga 748 na ka kaso sa mga nasakit sa COVID-19 sa Bohol ang naayo, gikan niadtong Marso.

Gitaho usab nga mas taas ang recovery rate sa Bohol kun itandi sa nasudnong rate, tumbok sa doctor nga politiko.

Segun sa Department of Health, ang nasudnong recovery rate anaa pa lamang sa 93 porsyento samtang ang Bohol naa na sa 95%.

Gipasabut ni Dr Lopez nga sa 100 ka nasakit sa COVID-19, 95 niini ang maayo samtang sa tibuok nasud, 93 lamang.

Hinuon, mas taas usab og case mortality ang Bohol sa 2 porsyento kon itandi sa nasudnong rate nga naa sa 1.94 porsyento. (rahchiu/PIA-7/Bohol)

Source: Philippines Information Agency (pia.gov.ph)