Hiligaynon News: Hiligaynon News: SSS pagasuguran ang WISP sa Enero

SYUDAD SANG ILOILO, Disyembre 28 (PIA) - - Iga-implementar sumugod Enero 2021 and ginlunsar sang Social Security System (SSS) ang panibag-o sini nga individual retirement saving plan nga ginatawag Workers’ Investments and Saving Program (WISP).

Ginpahayag ni Amiel Genova, Acting Senior Communications Analyst sang SSS Iloilo, nga ang WISP isa ka hilway kag tax-free individual retirement savings plan nga nagatuyo nga madugangan ang saving sang mga miyembro gikan sa regular program sang SSS.

Tanan nga mga empleyado sa pribado nga sektor, self-employed nga mga individwal, OFW, voluntary members nga wala sang pinal nga claim sa regular nga SSS program apang may kontribusyon sa regular nga SSS program ang sakop sa programa.

Automatic naman ang enrollment para sa mga miyembro nga may monthly salary credit (MSC) nga masobra sa P20,000.

Suno kay Genova ang kontribusyon sa WISP ang pagabayaran upod sa kontribusyon sa regular nga mga programa sang SSS.

“Igabutang sang SSS ang kontribusyon sang WISP sa mga ginatawag high yielding kag liquid investment nga ginapaabot magadala sang dugang nga pension income para sa mga nagabayad nga miyembro”, siling ni Genova.

Sa idalum sang WISP, ang total nga accumulated account value sang miyembro amo ang basehan sang dugang nga benepisyo nga igahatag sa tion sang pagretiro kag pagkuha sang total disability kag death benefits.

Subong man gindugang ni Genova, sumugod sa Enero, may panibag-o nga pagsaka sa SSS contribution rate sang isa ka porsyento, humalin 12 porsyento tubtub 13 porsyento santo sa Akta Republika Numero 11199 ukon SS Act of 2018.

Suno kay Genova ang dugang nga isa ka porsyento ang tungaon sa bahin sang employer kag employee – ang employer share mangin 8.5 porsyento halin sa 8 porsyento samtang ang employee share mangin 4.5 porsyento halin sa 4 porsyento.

“Ang gamay nga dugang sa kontribusyon magakahulugan sang benepisyo sa mga miyembro kung sila ang maghulam kag sa ila pagretiro”, siling ni Genova. (JSC/laf/PIA6 Iloilo)

 

 

Source: Philippines Information Agency (pia.gov.ph)