LUNGSOD NG COTABATO, Dis. 26 (PIA) – Itinurnover kamakailan ng Bangsamoro Autonomous Region in Muslim Mindanao (BARMM) government, sa pamamagitan ng Bangsamoro Rapid Emergency Action on Disaster Incidence (READi), ang mga kumpletong set ng mechanical ventilators sa dalawang mga ospital sa Maguindanao.
Ito ay upang mapalakas pa ang mga pagsisikap na labanan ang nagpapatuloy na krisis sa kalusugan dulot ng Coronavirus Disease 2019 o (COVID-19) sa rehiyon ng Bangsamoro.
Pinangunahan nina Ministry of Interior and Local Government (MILG-BARMM) Minister Atty. Naguib Sinarimbo at Ministry of Health (MOH-BARMM) Officer-in-charge Dr. Amirel Usman ang nasabing turnover ng mechanical ventilators sa Maguindanao Provincial Hospital sa Shariff Aguak at Datu Blah Sinsuat (DBS) District Hospital sa Upi.
Binigyang-diin ni Usman na ang nasabing turnover ay bilang paghahanda sa posibleng pagtaas ng kaso ng COVID-19 sa kalagitnaan ng Enero na inaasahan rin ng Department of Health (DOH) at World Health Organization (WHO).
Samantala, nagpahayag naman ng pasasalamat sa pamahalaan ng BARMM sina Maguindanao Provincial Health Officer Dr. Elizabeth Samama at Chief of DBS District Hospital Dr. Michael Macion para sa ipinamahaging medical equipment.
Maliban sa ventilators, namahagi din ang MOH ng medical at hygiene supplies na kinabibilangan ng surgical gloves, facemaks, face shields, alcohol, air purifier, at iba pa.
Plano din ng pamahalaan ng BARMM na magtungo sa island provinces ng rehiyon upang makapamahagi ng kaparehong kagamitan. (LTBlongon-PIA Cotabato City/With reports from BIO)
Source: Philippines Information Agency (pia.gov.ph)
0 Comments