Natatanging boluntaryo sa gitna ng pandemya, kinilala ng PNVSCA

LUNGSOD NG CALAMBA, Laguna, Enero 4, 2021 (PIA) -- Pinatunayan ng mga natatanging indibiwal na nagserbisyo sa gitna ng pandemya na nananatiling buhay ang diwa ng bayanihan. 

Kinilala ng Philippine National Volunteer Service Coordinating Agency (PNVSCA), sa ginanap na Search for Outstanding COVID-19 Volunteers (SOCV) noong ika-16 ng Disyembre, sa Lungsod ng Cabuyao, ang mga natatanging boluntaryo na naging katuwang ng pamahalaan sa paghahatid ng iba’t ibang serbisyo sa gitna ng pandemya. 

Itinanghal si Maria Guia de Leon bilang natatanging boluntaryo sa CALABARZON. Bilang pangulo ng Rotary Club, pinangunahan niya ang iba’t ibang proyekto, gaya ng ‘Pagkaing Dagdag Tulong’, na layuning matungunan ang pangangailangan ng mga frontline worker at mga pamilyang lubos na naapektuhan ng pandemya. 

Ayon kay de Leon, hindi naging madali ang kanyang naging karanasan sa pagseserbisyo dahil sa mga hindi magandang kumento kanyang natanggap. 

Aniya, “Nakaranas din ako ng bashing mula sa mga taong hindi nakakaintindi,” 

Isa lamang si de Leon sa 17 babae at lalaki mula sa iba’t ibang rehiyon na nagpamalas ng dedikasyon sa pagseserbisyo sa gitna ng pandemya. 

Kasama dito sina Clementia B. Lapas (CAR), JC Finale T. Siazon (Region 1), Dr. Zsa Zsa Meneses (Region 2), Dr. Joshua Toledo (Region 3), Napoleon Marilag (NCR), Melissa Grace Olit (MIMAROPA), Evita Tuazon (Region 5), Dr. Chris Gonzales Sorongon (Region 6), Atty. Jose Marie Gochangco (Region 7), Nino Labordo (Region 8), Jaime Salva (Region 9), Fr. Conrado Lacaba Casas, Jr. (Region 10), Vladimir Santos (Region 11), Jimboy Aldesco (Region 12), Gil Melo (Caraga), at Ascan Asgar (BARMM). 

“Despite the risks of the pandemic, the Bayanihan spirit lives on. May this be a start of the fruitful partnership of promoting volunteerism in the local government, ” ani National Economic and Development Authority Acting Secretary, Karl Kendrick Chua. 

Tampok ang SOCV sa pagdiriwang ng National Volunteer Month (NVM) tuwing buwan ng Disyembre. Layunin nitong himukin ang mga mamamayan na maging katuwang ng pamahalaan sa pagpapatupad ng iba’t ibang proyekto bilang mga boluntaryo. (PB)

Source: Philippines Information Agency (pia.gov.ph)