Aklanon News: Mga menor de edad, delikado gid nga sugtan mag guwa - Duterte

KALIBO, Aklan, Pebrero 2 (PIA) - - -Ginbawi ni Pangueong Rodrigo Roa Duterte ku Lunes ro nahaunang desisyon it gobyerno nga gina sugtan eon ro mga menor de edad nga maka guwa sa mga lugar nga sa idaeom it Modified General Community Quarantine o kun MGCQ bangod sa dueot nga
halit it raya ngarang bag-o nga variant it COVID 19 nga gina patihan nga umabot eon iya sa Pilipinas.

Sa desisyon it inter-agency Task Force for the management of Emerging Infectious Diseases o kun IATF-EID ku nagtaliwan nga Domingo, ro mga
inunga nga ga edad it 10 anyos pataas hay paga sugtan eon sa mga pang publikong lugar umpisa Pebrero 1, pero nag hambae si Pangueong Duterte
nga gina bawi nana ra para man sa pag protekta sa mga inunga.

Suno sa Center for Diseases Control and Prevention, sangkiri malang sa mga inunga ro nag maeasakit o kun ha-igo it COVID 19 ikumpara sa mga
magueang, pero bangod sa rayang bag-o nga strain, tanan hay delikado eon.

Naga hambae ro mga eksperto nga ro mga onga hay mga spreaders, indi makitaan it mga simtomas maskin ona eon kanda ro virus.

Sigurado nga indi magustuhan it mga ginikanan ag mga inunga ro pagbawi ngara, pero nag hambae ro Presidente nga kinahangean nga mag
sakripisyo anay kita para ma protektahan ro ika mayad nga eawas it publiko kapin eon gid nga naga hueat pa kita it bakuna.

Naga apela gid si Pangueong Duterte nga sa publiko nga sundon gid ro gina patuman nga health protocols it gobyerno, kapin eon gid nga nabatyagan eon naton ro presensya it UK Variant iya sa Pilipinas. (JBG/JERR/PIA 6 Aklan)

Source: Philippines Information Agency (pia.gov.ph)